Nga Bashkim Kastrati
Shëndetësia e Kosovës gjatë vitit 2016 u ballafaqua me probleme të ndryshme dhe të shumta, që nga mungesa e barnave nga lista esenciale dhe lista vitale, mungesa e barnave më specifike siç janë citostatikët që përdorën për trajtimin e sëmundjes së kancerit. Në anën tjetër problemet tjera ishin me mungesën dhe prishjen e aparaturave për diagnostikime. Në institucionet publike shëndetësore ekziston vetëm një aparat i rezonancës magnetike, ndërkaq kërkesat janë të shumta për të bërë incizime me këtë aparaturë. Për shkak të dinamikës së punës ky aparat duhet që pas një periudhë jo të gjatë të servisohet gjë që ndikon në listën e pritjes. Aktualisht deri në një vit duhet pritur për ta bërë një incizim me rezonancë. Por ka mungesë edhe të pajisjeve tjera që kanë kosto me të vogël.
Problem tjetër ishte edhe ikja e stafit mjekësore sidomos në gjermani. Profesionistët shëndetësor me masë të madhe janë duke ndjekur kurse të gjuhës gjermane për të shkuar pastaj në Gjermani për të ushtruar profesionin e tyre në mënyrë që të kenë një jetë më të mirë dhe kushte më të mira të punës. Problem tjetër është edhe ikja e anesteziologëve në sektorin privat, të cilët pasi marrin përvojën e duhur në QKUK ikin në sektorin privat.
Gjithashtu funksionimi i disa klinikave si ajo e kardiokirurgjisë ka qenë problem tash e sa kohë.
Këto janë disa nga problemet kryesore me të cilat u përballë fusha e shëndetësisë, ndërsa gjasat reale për të përmirësuar këtë gjendje janë të pakta.
Viti 2017 nuk pritet që të sjellë ndryshime pozitive në shëndetësi
Blerim Syla kryetar i Federatës Sindikale të Shëndetësisë së Kosovës, ka thënë për tesheshi.com se viti 2016 nuk ishte i mirë për fushën e shëndetësisë në Kosovë. Ai thotë se shëndetësia u përballë me shumë probleme të cilët e vështirësuan punën e profesionistëve shëndetësorë.
“Sa i përket shëndetësisë ky vit që po e lemë as që mund të flitet për ndonjë sukses në menaxhimin e saj. Nuk ishte prioritet i Qeverisë. Sukses mund t’i thuhet vetëm punës së profesionistëve shëndetësor të cilët edhe pse me kushte minimale arritën t’i kryejnë obligimet e veta”, thotë Syla.
Ai thotë se as në vitin 2017 nuk pritet që të ketë ndryshime esenciale pasi që shëndetësia nuk është prioritet real i qeverisë dhe se këtë e tregon ndarja e buxhetit për këtë vit.
“Pyetjes se çka duhet të bëhet në vitin 2017 nuk munde t’i jap ndonjë përgjigje ngase vet buxheti për shëndetësi tregon mjaft. Por Ministria e Shëndetësisë duhet të marrë masa urgjente për infrastrukturë të përmirësohet furnizimi me barna e material shpenzues të mos manipulohet me opinion se kinse në po furnizojmë dhe mbi të gjitha Ministria e Shëndetësisë duhet të jetë shumë më transparente me akterët e sistemit shëndetësore dhe popullatës.
Ai thotë se federata sindikale të cilët ai e udhëheq , është e gatshme për të bashkëpunuar dhe për të dhënë kontributin e saj në përmirësimin e gjendjes në shëndetësi.
“Në fund nëse dëshirojmë Ligj për Sigurime Shëndetësore, urgjent të formohen grupet e ekspertëve dhe të jepen raporte mujore, e jo të mendohet se si do të ndalen parat e qytetarëve. Pra jam skeptik se me ketë buxhet dhe me këto politika, Ministria e Shëndetësisë do të ketë sukses. Ne si sindikatë jemi gati të japim kontributin tonë”, theksoi Syla.
Ja veprimet që duhet të ndërmerren për të përmirësuar gjendjen e shëndetësisë
Xhemajl Selmani, kryetar i Sindikatës së Qendrës Klinike Universitare të Kosovës, ka thënë për tesheshi.com se në fushën e shëndetësisë kanë vazhduar trendët negative dhe nuk mund të flitet për progres.
Sipas tij, në shëndetësi, sikur edhe më herët, kanë vazhduar përpjekjet pozitive transparente sa për sy e faqe dhe publik.
“Në realitet çakejtë kanë vazhduar ta çnukun (rrjepin) shëndetësinë ku ndihmesë dhe mbulesë e kanë pasur dhe e kanë sistemin e prokurimit. Është folur shumë për sistemin e sigurimeve shëndetësore që e presim sikur ujin e pakët por në realitet, infrastruktura e cila e bën sistemin si dhe investimet me mjete materiale janë zero, përkundrazi ministri i financave ua ndërroi destinimin rreth 5.2 milionë eurove që ishin për shëndetësi dhe e varfëroi atë”, thotë Selmani.
Ai thotë se për shëndetësi, flasin politikanët tanë, por veprimet janë në vend, prioritetet i kanë tjera.
Ai thotë se institucionet përkatëse duhet që të ndërmarrin këto veprime: “Të jenë serioz kur flasin dhe planifikojnë për sistemin shëndetësor! Të mendojnë seriozisht për këtë shtyllë të shtetit, sepse duke menduar dhe investuar në te, mendojnë për shëndetin e popullit pra edhe të votuesve të vet! Të investojnë në kuadro dhe vende pune për të rinjtë që vijnë në sistemin shëndetësor, që kurset e gjuhëve të huaja që ndiqen nga ata, të jenë për hobi dhe jo për të ikur nga vendi për një jetë më të mirë, sepse mosha mesatare e personelit shëndetësor aktual është mbi 50 vjeç. Nëse mendojnë për implementimin e sistemit të sigurimeve, t’i ndajnë 400 milionë euro, aq sa populli ynë shpenzon nga investimi i shtetit, në të dy sistemet edhe në atë publik edhe privat, në regjion dhe rajon. Nëse shteti vë dorë seriozisht, paraja që del jashtë do të harxhohet brenda shtetit! Uroj që në këtë vit të kthjellemi të gjithë, por më së shumti politikanët tanë dhe ta forcojmë sa më shumë shoqërinë dhe shtetin tonë”. /tesheshi.com/
