Jessica Cox, një 32-vjeçare amerikane është pilotja e parë në botë pa krahë. Ajo jeton në Phoenix të Arizonës. Për shkak të një problemi në lindje, Jessica nuk i ka pasur krahët që fëmijë. Mirëpo, kjo paaftësi nuk e ka penguar të ndjekë ëndrrat e saj dhe të arrijë objektiva shumë ambiciozë.
Në moshën 3 vjeçare ka performuar si gjimnaste artistike, në moshën 5 vjeçare ka mësuar të notojë dhe në moshën 6-vjeçare nisi tip-tapin.
Kur ishte 10 vjeç filloi të merret me taekwondo, art marcial korean dhe arriti të fitojë rripin e zi. Njëkohësisht filloi të luante në piano, si dhe mori patentën për drejtimin e makinës ndërsa u diplomua për psikologji.
Ajo është aq e aftë saqë arrin të vendosë në sy lentet e kontaktit, në vend të syzeve, duke përdorur këmbët. Objektivin më ambicioz, vajza e re e ka arritur në vitin 2008, kur arriti të mësojë se si të drejtojë nj mjet fluturimi.
Pas tre vitesh stërvitje dhe trajnime, vajza arriti të hyjë në librin e Rekordeve Guiness, si pilotja e parë pa krahë. Jessica mund të pilotojë avionë të lehtë në lartësi mjaft të konsiderueshme.
“Njerëzit mendojnë se të jesh pa krahë është një kufizim, por limitet dhe kufizimet janë vetëm në kokën tonë”,- ka thënë ajo. /tesheshi.com/
