Është bërë e udhës që banorët të mos jenë dakord me vendimet dhe projektet e reja, që herë pas here janë të kushtëzuara për të shembur lloj-lloj objektesh që u dalin përpara. Në të shumtën e rasteve, banorët dalin para eskavatorëve të Inspektoriatit Kombëtar të Mbrojtjes së Territorit, për të mbrojtur me trup ato godina që kanë ndërtuar me kursimet e tyre, qofshin me, apo pa leje.
E tillë ishte situata edhe sot (e premte) në rrugën “Faik Konica” në kryeqytet, gjatë aksionit të IKMT-së për zgjerimin e aksit që lidh stadiumin kombëtar me Fakultetin e Histori- Filologjisë. Aksioni ka ndeshur në rezistencën e banorëve, madje gjatë përleshjes me policinë dy gra kanë humbur ndjenjat.
Po ashtu, policia është qëlluar me gurë dhe sende të forta, gjatë kohës kur po shembnin 6 mure rrethuese. Kështu që, i lënduar ka mbetur edhe një efektiv policie.
Në vendin e ngjarjes ka mbërritur autoambulanca dhe u ka ardhur në ndihmë banorëve, ndërsa është dashur ndërhyrja e Forcave të Ndërhyrjes së Shpejtë, të cilët shoqëruan 5 persona që qëlluan mbi inspektorët.
Banorët pretendojnë se banesat e tyre janë legale dhe se do të shemben për t’i hapur rrugë ndërtimit të një pallati shumëkatësh, ndaj dhe u kanë kërkuar autoriteteve që të ndërhyjnë, për t’a parandaluar një gjë të tillë./tesheshi.com/
