Reshjet e ditëve të fundit dhe cilësia e dobët e punimeve kanë vënë në pikëpyetje ecurine e Rrugës së Kombit. Shkak është bërë çarja masive e malit në dy pika të saj, duke sjellë rrëshqitjen e dherave mbi trupin e rrugës, si dhe duke vënë në rrezik jetën e udhëtarëve. Ky fakt u bë i ditur nga kreu i Emergjencave Civile, Shemsi Premçi, i cili shoqëroi kryeministrin Edi Rama gjatë një inspektimi në një prej këtyre pikave në segmentin Rrëshen-Kalimash.
“Matjet që bënë specialistët e shërbimit gjeologjik, ishte shumë e thellë rrëshqitja këtu, por më e thellë ishte ajo në fshatin Klos. Parashikohet të çahet i gjithë mali. Është larguar 60 centimetra,” – tha Premçi.
Kryeministri Rama nënvizoi se zgjidhja e këtij problemi do të jetë puna e parë e kompanisë që do të mirëmbajë rrugën. “Kjo do jetë ndërhyrja e parë që do bëhet për ta sistemuar në mënyrë që mos thellohet kjo çarje dhe mos ketë pasojë të tmerrshme për gjithë projektin. Kështu është, janë bërë pa studime gjeologjiket ë mirëfillta, pa ndjekur gjithë procesin teknik, ashtu si duhet, pas berihait, po sidoqoftë besoj se do jetë shumë shpejt e stabilizuar kjo pjesë e ndërkohë do fillojë punë për përfundimin e për mirëmbajtjen në vazhdimësi gjatë gjithë viteve, që mos ketë asnjë problem,” – theksoi Rama.
“Qetësohet” lumi Fan
Banorët e Mirditës nuk do të përballen me përmbytje, sa herë ka reshje shiu, që shkaktonin fryrjen e lumit Fan i Vogël. Një investim i qeverisë shqiptare po krijon mundësinë e ndërtimit të mbrojtjes lumore, e përbërë nga argjinatura prej 3.35 kilometrash dhe 12 penela tërthore me gjatësi 10 metra. Ndrec Dedaj, kryetari i Bashkisë Mirditë tha se falë kësaj ndërhyrje, u shmang dalja e lumit nga shtrati. “Parandalues për ujësjellësin, për linjën elektrike, për shkollën e fshatit, shtëpitë këtu. Po të mos ishte bërë ky investim do të kishte nxjerrë jashtë funksioni edhe rrugën nacionale,” – tha kryetari i bashkisë.
Në muajin janar të këtij viti, në fshatin Mashtërkor të Oroshit, lumi doli nga shtrati si rezultat i reshjeve dhe ndryshoi rrjedhën e tij, duke rrezikuar jetën e banorëve, dëmtuar mijëra tokë bujqësore, tubacionet kryesore të ujësjellësit për 16 mijë banorët e Rrëshenit dhe kanalet kulluese të autostradës.
Kryeministri inspektoi edhe një sërë projektesh infrastrukturore në qytetin e Rrëshenit. i tillë është edhe rikualifikimi urban i sheshit të qytetit Rrëshen, një investim me vlerë 187 milion lekë dhe do të ofrojë mjedise me gjelbërim dhe ndriçim dekorativ.
Ata panë nga afër edhe ecurinë e punimeve për sheshin, shkollën e mesme, pedonalen dhe disa rrugë të rëndësishme për qytetin./tesheshi.com
