Shtëpia e Zekajve në Lezhë, objekt “Monument Kulture” i ketegorisë së parë është shembur plotësisht. Kjo banesë karakteristike në lagjen Shehër nuk i rezistoj dot motit të rënduar me reshje duke u plandosur përtokë si pasojë e mosndërhyrjes në të prej vitesh.
Dhe prej 2 ditësh ajo është kthyer në gërmadhë. Ky rrënim i të shkuarës së Shehrit, qytetit të vjetër të Lezhës, ishte paralajmeruar, por Ministria e Kulturës nuk reagoi, pretendon ish-përgjegjësi i Kulturës Kombëtare në Lezhë, Paulin Zefi, që thotë është humbur një perlë arkitekturore, rrënimin e të cilës e kishte paralajmëruar.
Sipas tij, ministrja Kumbaro heshti ndaj nevojës për të investuar 12 mijë euro në këtë objekt, ndërsa tani do të duhen 150 mijë euro për ta ngritur në këmbë.
Zefi thotë se nuk mund të përdoret si justifikim amortizimi ndër vite pasi ekzistonte mundësia për ta mbrojtur.
“Ka qenë i vetëm ansambël ndërtimor dhe kompleks rezidencial në veriun e Shqipërisë i ndërtuar sipas stilit të shtëpive të Gjirokastrës. Është ndërtuar në fund të shekullit të 17-të dhe në fillim të shekullit të 18-të. Është një banesë rreth 300-vjeçare. Edhe pse unë e kam dhënë alarmin për këtë shtëpi se do shembet, Ministria e Kulturës nuk mori asnjë masë. Unë vetë përsonalisht i ka bërë dy herë kërkesë ministres Kumbaro dhe ja kam shoqëruar edhe me foto që të ndërhyhet sa më parë, por nga ajo nuk pati asnëj reagim. Kjo shtëpi tani është shembur dhe nëqoftëse në shtator të vitit që lamë pas ne mund të ndërhynim me një shumë prej 12 miëj eurosh, do ta shpëtonim, ndërsa sot nevojiten të paktën 150 mijë euro për ta ringritur. Dua të them se kemi humbur një perlë të jashtëzakoshme të historisë së qytetit të Lezhës”, tha Paulin Zefi Ish-përgjegjës i Kulturës Kombëtare Lezhë
Banesa qytetare Zekajve ishte pronë e Sali Bajram Zekës në lagjen e vjetër piktoreske Shehër, i kategorizuar prej vitesh si “Monument Kulture” i kategorisë së parë; i marrë nën mbrojtje që ne vitin 1963 dhe është pronë shtetërore nën administrimin e plotë të Ministrisë së Kulturës.
Përgatiti: Ahmet Zani – /tesheshi.com/
