Gjigandi britaniko-holandez i naftës Shell ka njoftuar se po tërhiqet nga shitës poakice në Mbretërinë e Bashkuar, Gjermani dhe Holandë për shkak të fitimeve të dobëta, duke pritur që të arrijë një marrëveshje me blerësit e mundshëm në muajt e ardhshëm.
Jo shumë kohë pasi mori drejtimin e Shell, CEO Wael Sawan nisi një rishikim strategjik të biznesit të shitjes me pakicë në Evropë në janar, duke përmendur “kushtet e vështira të tregut” si arsye, kujton Reuters.
“Kjo analizë tani ka përfunduar dhe rezultati është plani ynë për t’u tërhequr. Procesi i shitjes tashmë është duke u zhvilluar, me synimin për të arritur një marrëveshje me një blerës të mundshëm në muajt në vijim”, njoftoi Shell.
Biznesi me shumicë, jo pjesë e shitjes
Biznesi me shumicë i shitjeve të energjisë për kompanitë dhe furnizimi i kompanive të vogla dhe të mesme nën markën Shell Energy, dhe shitja me pakicë e produkteve të energjisë për familjet në vende jashtë Evropës nuk do të jenë pjesë e shitjes së mundshme, shtoi Shell.
Reuters raportoi muajin e kaluar se tre nga furnizuesit më të mëdhenj të energjisë elektrike në Britani kishin treguar interes për të marrë përsipër biznesin e shitjes me pakicë të Shell në Mbretërinë e Bashkuar. /tesheshi.com/
