Tritan Shehu, deputet i PD-së, ka reaguar lidhur me intervistën e Ramës të dhënë për gazetën gjermane, “Frankfurter Rundschau”, ku shprehet se nuk e kupton frikën e udhëheqësve evropianë, të cilët sipas tij, e lidhin hapjen e negociatave të pranimit në BE, me zgjedhjet në vendet e tyre apo rebelimin e opinionit publik. Sipas Ramës, e gjitha kjo është një çmenduri. Por Shehu i sugjeron Ramës që të japë sa më pak intervista, sepse opozitës akoma nuk i ka humbur durimi për në BE.
Madje deputeti i PD-së përmes rrjeteve sociale shkruan se Rama me intervistat e tij në mediat ndërkombëtare veçse e dëmton integrimin e Shqipërisë.
“Reflektim për dy intervistat problematike të tij në tre ditë:
1-Në gazetën gjermane “Frankfurter Rundschau” ai pothuajse “kërcënon” BE për vonesën në hapjen e negociatave me ne, duke deduktuar se shqiptarët po humbin durimin ndaj Brukselit, gjë që mund t’i bëjë të ndërmarrin hapa të tjera!!
Shqiptarët nuk po humbin durimin ndaj Brukselit që është e vetmja alternativë për ne, por ndaj vetë z. Rama.
Vonesa jonë në këtë proçes, e veçanërisht parakalimi i vendeve të tjera të Rajonit, vjen për shkak të problemeve tona, krimit, drogës, korrupsionit, aventurizmit etj, përgjegjësi, për të cilat është Qeveria e drejtuar nga ai.
Më tej “gafat” thellohen kur kryeministri kërkon të shfaqet si “babai i një kombi të diskriminuar”, duke “harruar” se shqiptarët tashmë jetojnë e qeverisin vetë në shtete demokratike në Rajon, gjë që nuk ndodh me disa popuj të tjerë europiane.
Ndonëse i sapo kthyer nga Italia ai lë në harresë rolin e madh të Romës në proçeset tona integruese dhe demokratike.
Motori i BE mbetet Trekëndëshi Berlin-Paris-Romë, të cilin z.Rama paradoksalisht e redukton ne boshtin “Berlin-Paris”, gjë që bie ndesh edhe me interesat tona.
2-Në intervistën për “La Republica” nga Roma, ai provokon dëmtueshëm Brukselin me përcaktimin që i bën “Rajonit” me vendet e tij. Ai “harron” se termi “Ballkan Perëndimor” është politik e i vetmi, që përdoret nga BE për Rajonin tonë me perspektive europiane. Ne nuk kemi asnjë interes ta vemë në dyshim këtë përcaktim e përbërësit e tij!!”, shkruan Tritan Shehu. /tesheshi.com/
