Kreu i Fondit Monetar Ndërkombëtar (FMN), Kristalina Georgieva tha se ekonomia globale tani është në recesion për shkak të COVID-19, e kjo sipas saj vlen për t’u dëgjuar se liderët botërorë po kuptojnë më në fund se vetëm një përpjekje e koordinuar do të ketë sukses në ndalimin e përhapjes së koronavirusit.
“Bota është në recesion tani, dhe gjatësia dhe thellësia varen nga dy gjëra: kufizimet në përhapjen e virusit dhe një përgjigje efektive e koordinuar ndaj krizës,” i tha ajo CNBC.
Ajo shtoi se është shumë e inkurajuar nga ajo që sheh tani – mirëkuptimi midis udhëheqësve globalë se nëse nuk e kapërcejmë virusin kudo, nuk do të jemi në gjendje të dalim nga kriza.
“Ne nuk duhet të shkojmë me masa të vogla kur e dimë se është një krizë gjigande. Asnjëherë nuk kemi parë që ekonomia botërore të ndalet. Tani e shohim atë. Si do ta rigjallërojmë, është një temë tjetër e rëndësishme,” tha ajo.
FMN ka ndërmarrë masa të jashtëzakonshme gjatë javëve të fundit për të ndihmuar në luftimin e ndikimit ekonomik të COVID-19.
Përpjekjet për të parandaluar përhapjen e virusit kanë pasur një ndikim të madh negativ në ekonomi.
Më 16 mars, FMN njoftoi se ishte e gatshme të përdorë aftësitë e saj të financimit prej 1.000 miliardë dollarë për të ndihmuar vendet në mbarë botën të luftojnë me ndikimin humanitar dhe ekonomik të koronavirusit të ri. /tesheshi.com/
