Nga mëngjesi në darkë, nga qoshja më e “ndriçuar” e globit, në skutën më të padukshme të tij, të gjithë flasin për futbollin e Barcelonës, Realit, Bajernit, Manchesterit etj.
Të gjithë flasin për Champions League e rivalitet. Edhe është normale të flitet kur klubet shkëlqejnë nga milionat, yjet që kanë në përbërje e marketingu.
Por pakkush e di që ndoshta asgjë nga këto mund edhe të mos egzistonte, nëse nuk do krijohej klubi i parë i futbollit, një klub që sot ndoshta e shohin me inferioritet për shkak të kategorisë ku luan e gjendjes ku ndodhet.
Asgjë ndoshta nuk do të qe prezente nëse nuk do të krijohej Shefild Futboll Club, i cili një ditë më parë, mbushi 160 vjet nga themelimi.
Pikërisht në 24 tetor 1857, një grup njerëzish që kishin filluar të luanin një tip “rrëmuje” duke vrapuar pas një sfere të sajuar, ndjenë se duhej të organizoheshin, të vinin rregulla në lojë, e të bënin diçka serioze, që të mund ta bënin edhe të tjerë.
E kështu lindi klubi i parë i historisë së futbollit, Shefild F.C.
Brenda idesë u sajuan disa ndeshje, e meqë kundërshtar nuk kishte, lojtarët luajtën mes vedit duke u ndarë në Skuadrën e të Martuarve dhe Skuadrën e Beqarëve.
Krisuik ka qenë një mbiemër që ka mbetur në themel të këtij kontributi, pasi “çertifikoi” klubin e parë të historisë së futbollit dhe u tregua i gatshëm ta përhapë nismën e tij në qytete të tjera.
Kështu që me hir a pahir, të mëdhenjtë duhet t’i përkulen me respekt Shefildit historik e themeluesve të klubit të futbollit, që “shpikën” rrugëtimin e lojës më të ndjekur në planet. /tesheshi.com/
