Në të parën vizitë jashtë vendit që prej marrjes së detyrës, kryeministri i Turqisë ka deklaruar nga Azerbajxhani se, “Ata që votuan për këtë vendim kanë nënshkruar një gënjeshtër historike.”
Komentet janë bërë në një konferencë të përbashkët për shtyp me presidentin azer, Ilham Alijev, ku miku turk ka shtuar, “Ne besojmë se historia duhet t’u lihet historianëve.”
Binali Jëlldërëm e ka kritikuar bashkësinë ndërkombëtare për standarde të dyfishta, duke e patur fjalën për masakrat armene në tokën azere.
“Pse këto vende nuk e vënë në dukje masakrën e Hoxhallësë? Ky është gjithashtu një gjenocid, kjo është po ashtu një masakër. Ne shohim të vazhdojë një standard i dyfishtë.”
Presidenti i Azerbajxhanit, Alijev, mbajti të njëjtin qëndrim, duke e quajtur një gabim të madh vendimin e parlamentit gjerman për t’i përcaktuar si “gjenocid” ngjarjet e 1915-ës.
“Ne nuk e marrim këtë seriozisht. Ky ishte një gabim historik. Ne jemi gjithmonë me Turqinë.”
Kurse zëdhënësi i presidentit turk, Ibrahim Kallën, do ta përshkruante rezolutën e Bundestagut si “shembull të papërgjegjshmërisë politike”.
“Rezoluta nuk ka kuptim apo vlefshmëri për Turqinë,” do të thoshte ai nga Kenia. “Ne e dënojmë në mënyrën më të fuqishme këtë rezolutë.”
Me kthimin e presidentit Erdogan në Turqi pritet të ketë një reagim më të plotë dhe më të fortë ndaj rezolutës. /tesheshi.com/
