Frank-Walter Steinmeier, ministri i Jashtëm gjerman, e ka parë me optimizëm lajmin e tërheqjes së trupave ruse në Siri, edhe pse jo plotësisht. Ai mendon se kjo do ta detyrojë Beshar Esadin t’i marrë më seriozisht negociatat.
“Nëse materializohet njoftimi për një tërheqje të trupave ruse, kjo e shton presionin mbi Esadin për të negociuar përfundimisht në një mënyrë serioze në Gjenevë një tranzicion politik që i ruan stabilitetin e shtetit sirian dhe interesat e popullsive të tij.”
Shefi i politikës së jashtme gjermane ka shtuar në deklaratën e tij se, “Po qe se armëpushimi mund të jetë shenjë që, pas pesë vitesh lufte, palët në konflikt janë lodhur më në fund nga lufta dhe e pranojnë se askush nuk mund ta fitojë ushtarakisht konfliktin, atëherë ka një shpresë se mund të funksionojë një zgjidhje politike.”
Putini urdhëroi dje nisjen nga dita e sotme të tërheqjes së trupave ruse nga Siria, me arsyetimin se objektivat ishin arritur. Ndërsa po dje rifilluan dhe bisedimet e paqes në Gjenevë, ky qe një zhvillim i papritur, që mund të ndihmojë në përparimin e negociatave. /tesheshi.com/
