Antonio Guterres ka bërë një vizitë të paparashikuar në Somali, ku ka parë nga afër dramën e një populli të gjunjëzuar nga thatësira, nga uria e kolera.
I tronditur nga ajo çfarë i kanë zënë sytë, shefi i ri i OKB-së ka lëshuar një apel të fortë për tërë botën: “Njerëzit po vdesin. Bota duhet të veprojë tani për ta ndaluar këtë. Duhet të bëjmë zhurmë aq sa është e mundur. Konflikti, thatësira, ndryshimi klimaterik, sëmundja, kolera. Kombinimi është një makth.”
Guterres i ka parë nga afër të sëmurët me kolerë në Baidoa, 243 kilometra në veriperëndim të kryeqytetit të vendit. Për të, kjo krizë humanitare kërkon një reagim masiv, pasi gjashtë milionë njerëz, apo thuajse gjysma e popullsisë së Somalisë, ka nevojë për ndihmë.
“Çdo person që kemi parë është një histori personale e vuajtjeve të jashtëzakonshme. Nuk ka mënyrë për ta përshkruar atë,” qenë fjalët e njeriut që drejton OKB-në.
Ai ka kërkuar mbështetje të gjerë ndërkombëtare për t’u ardhur në ndihmë somalezëve ndërsa kriza e urisë përkeqësohet.
Thatësira e tejzgjatur ka bërë që vendi të vuajë nga uria, së cilës i janë bashkuar dhe sëmundjet e shpërthyera prej mungesës së ujit të pastër. Javën e shkuar, 110 persona humbën jetën në një rajon brenda 48 orëve. /tesheshi.com/
