Një shprehje thotë se: shefi ka gjithmonë të drejtë! Madje edhe kur e ka gabim. Ky është profili i një shefi arrogant, mbase të zakonshëm. Por ka edhe modele të tjerë shefash, të cilët e vënë lumturinë e vartësve të tyre në krye të axhendës. I tillë është rasi i shefit ekzekutiv të një kompanie, i cili ka planifikuar t’ua rrisë pagën gjithë punonjësve të kompanisë së tij, duke reduktuar pagën e vet. Dan Prince, shefi ekzekutiv i kompanisë me bazë në Seattle të Shteteve të Bashkuara, “Gravity Payments”, i mblodhi bashkë 120 punonjësit e tij të hënën, për t’u kumtuar lajmin e madh.
Ky lajm, për disa, do të thotë madje edhe dyfishim të rrogës vjetore. Price, 30 vjeç, deklaroi edhe në televizion se sipas mendimit të tij, pagat e shefave ekzekutivë janë të ekzagjeruara. Për të përballuar ndryshimin fianciarisht, shefi ekzekutiv reduktoi pagën e tij të majme nga 1 milionë dollarë në 70 mijë dollarë. Sipas ndryshimit të ri, paga minimale do të shkojë deri në 70 mijë dollarë në vit, ose do të shtohet me 5 mijë dollarë krahasuar me sa ka qenë më parë. Ndërkaq vetë shefi është betuar dhe ka premtuar se pagën e tij nuk do ta rrisë pa u dyfishuar të ardhurat vjetore të kompanisë. Kompania që ka 120 të punësuar është një nga kompanitë e reja dhe të suksesshme në vend.
Po si reaguan punonjësit kur morën lajmin e papritur? Thjesht heshtën në mosbesim dhe, vetëm pas pak çastesh shpërthyen në duartrokitje. Disave ju desh pak kohë për të kuptuar se nuk bëhej fjalë për një shaka, por për një realitet të bukur. “Unë kam një jetë shumë luksoze, por besoj se ekstremet në një shoqëri ku ka shumë që vuajnë për bukën e gojës nuk janë të mira. Sa më shumë të kesh, aq më shumë të ndërlikohet jeta dhe kur jep në fakt, pasurohesh!”
