I gjendur në Rusi, në një forum ekonomik, Jean-Claude Juncker ka theksuar se Bashkimi Europian nuk do të shkatërrohet në rast të një votimi në Britani për ta lënë atë. Por ai ka vënë në dukje në të njëjtën kohë se do të nxirren mësime nga ajo çfarë pritet të ngjasë.
“Ky euroskepticizëm nuk është i pranishëm vetëm në Britani,” ka thënë zyrtari më i lartë i Komisionit Europian, duke kërkuar nxjerrjen e mësimeve nga Brexit-i.
Anketimet e reja kanë treguar se ka një shumicë britanikësh që janë pro daljes nga BE-ja, e kjo mund të reflektohet në referendumin e pas një jave.
“Nëse Britania e lë Bashkimin Europian,” është shprehur ai në forumin ekonomik ditën e djeshme, “kjo do të sjellë një periudhë pasigurie të madhe, në Britani dhe në BE, e në një nivel më tepër global, dhe kjo duhet shmangur.”
Juncker ka këmbëngulur megjithatë se rezultati i referendumit dhe dalja e mundshme e Britanisë jashtë unionit nuk sjell rrezikun e marrjes fund të BE-së.
“Nuk mendoj se Bashkimi Europian ka për të qenë në rrezik vdekjeje nëse Britania largohet, sepse ne vazhdojmë procesin e bashkëpunimit të ngushtë në Europë.” /tesheshi.com/
