Koreja e Verut po siguron teknologjinë për programet e saj bërthamore nëpërmjet ambasadës së saj në Berlin. Kështu ka deklaruar kreu i inteligjencës gjermane, Hans-Georg Maassen, i cili u shpreh se kjo teknologji mund të përdoret si për qëllime civile ashtu dhe ushtarake.
Edhe pse është vendosur nën presion nëpërmjet sanksioneve ndërkombëtare, Koreja e Veriut nuk ka ndaluar prodhimin e raketave dhe armëve bërthamore.
Një raport i OKB tha këtë të premte se vitin e kaluar Koreja e Veriut kishte fituar afërsisht 200 mln dollarë nga eksporti i mallrave të ndaluar ndërsa përmendi disa vende si bashkëpunëtore në thyerjen e embargos, si Kina, Rusia dhe Malajzia.
“Ne kemi vënë re se ka patur shumë aktivitete prokurimi nga ambasada. Nga këndvështrimi ynë, këto veprime ishin për programin e raketave, por gjithashtu pjesërisht për programin bërthamor. Kur i shohim gjëra të tilla, ne i ndalojmë ato, por nuk mund të garantojmë që të shohim dhe ndalojmë çdo përpjekje nga ana e Koresë”, u shpreh kreu i inteligjencës gjermane.
Ndërkohë Koreja e Veriut ende nuk i është përgjigjur komenteve të Maassen. Testi i fundit i raketave balistike, më 28 nëntor, nxiti një seri të re masash nga OKB, me shënjestër dërgesat e benzinës dhe udhëtimet për koreanoveriorët. /tesheshi.com/
