Sekretari i Përgjithshëm i NATO-s, Jens Stoltenberg tha se Rusia ka rritur praninë e saj ushtarake në dhe rreth Ukrainës dhe paralajmëroi se ekziston rreziku i një konflikti të ri të armatosur në Evropë.
Gjatë vizitës së tij zyrtare në Rumani, Stoltenberg u takua me presidentin rumun Klaus Iohannis në bazën ushtarake Mihail Kogalniceanu.
Duke iu drejtuar shtypit pas takimit, Stoltenberg komentoi krizën në marrëdhëniet midis Rusisë dhe Ukrainës.
“Për momentin, ne shohim se Rusia vazhdon të rrisë praninë e saj ushtarake në dhe rreth Ukrainës. Prandaj, ekziston një rrezik real i një konflikti të ri të armatosur në Evropë”, paralajmëroi Stoltenberg.
Ai theksoi se numri i ushtarëve rusë në rajon është rritur dhe se ekziston rreziku i një pushtimi të plotë rus të Ukrainës.
“Ka edhe rreziqe që lidhen me akte të tjera agresive. Kjo përfshin përpjekjet për të përmbysur qeverinë në Kiev, sulme hibride kibernetike dhe shumë agresione të tjera ruse”, tha Stoltenberg.
Duke thënë se ka shumë oficerë të inteligjencës ruse në Ukrainë dhe se Rusia ka treguar më parë veprime agresive kundër Ukrainës, Stoltenberg bëri thirrje për kujdesin e nevojshëm.
Ai tha gjithashtu se NATO ka forcuar krahun e saj lindor gjatë muajve të fundit dhe është e gatshme ta forcojë më tej atë me avionë, anije dhe njësi luftarake amerikane dhe britanike.
Ai bëri të ditur se planet për forcimin e pranisë së NATO-s në Evropën Lindore dhe Juglindore do të diskutohen në takimin e ministrave të mbrojtjes të NATO-s, i cili do të mbahet në Bruksel më 16 dhe 17 shkurt. /tesheshi.com/
