Shefi i misionit EULEX në Kosovë, Gabriel Meuçi deklaroi se problem i personave të pagjetur është shumë i rëndësishme për familjet e tyre, por edhe për misionin e BE-së. Ai e konsideroi atë çështje të një rëndësie të jashtëzakonshme për misionin.
Në prag të ditës Ndërkombëtare të personave të pagjetur, Meucci ka dalë me një deklaratë ku në emër të EULEX sqaron punën e bërë deri më tani. Nga dhjetori i vitit 2008, kur misioni nisi punën me njësinë për mjekësi ligjore të ministrisë së Drejtësisë në Kosovë, familjeve u janë kthyer mbetjet mortore të 483 personave të vrarë.
“Gjatë disa viteve të kaluara, EULEX-i i ka stërvitur ekipet lokale në terren për kryerjen e vlerësimit të lokacioneve dhe të zhvarrosjes, me qëllim që të forcohen kapacitetet e Kosovës në këtë proces të vështirë të kërkimit për të zhdukurit”, thuhet në deklaratën e tij.
Shefi i EULEX premton se misioni do të mbetet i përkushtuar për dhënien e mbështetjes për institucionet e Kosovës me ekspertizë në fushën e mjekësisë ligjore, në mënyrë që të zbardhet fati i të zhdukurve, sa më shpejt./tesheshi.com/
