Sergei Lavrov, ministri rus i Punëve të Jashtme, u shpreh sot se SHBA-të po dërgojnë sinjale se duan të nisin rregullimin e marrëdhënieve me Rusinë.
Aneksimi rus i Krimesë dhe përfshirja në konfliktin në Ukrainë, posaçërisht në pjesën lindore të saj, i kanë tensionuar prej kohësh marrëdhëniet mes Rusisë dhe SHBA-ve.
Duke folur në një takim rinor pranë kryeqytetit rus, Lavrov e bëri të qartë se Rusia është e hapur për dialog, por theksoi në të njëjtën kohë se ajo nuk do të “lutet” për marrëdhënie më të mira.
“Por nëse ne marrim një propozim për të nisur, edhe gradualisht, riaktivizimin e këtyre kanaleve, mekanizmave, për dialog dhe bashkëpunim, të ngrira nga partnerët tanë amerikanë, jam i sigurt … se ne do të biem dakort t’i riaktivizojmë këto kanale,” tha kryediplomati rus.
“Ne tashmë po marrim sinjale të tilla nga amerikanët,” vijoi Sergei Lavrov, “ndonëse tani për tani jo shumë të qarta.”
Rënia disi e tensionit u lajmërua dhe javën e shkuar, kur Lavrovi deklaroi se presidenti rus, Vladimir Putin, do ta “shqyrtonte në mënyrë konstruktive” çdo kërkesë për një takim me homologun amerikan, Barak Obamën, kur ai të udhëtonte drejt Nju-Jorkut muajin e ardhshëm për Asamblenë e Përgjithshme të Kombeve të Bashkuara.
Në ftohjen e marrëdhëniet midis Rusisë dhe SHBA-ve ka ndikuar veç konfliktit ukrainas dhe kriza siriane, në lidhje me mënyrën e zgjidhjes të së cilës palët nuk janë në një mendje. /tesheshi.com/
