Donald Trump hodhi në fundjavë akuza të rënda ndaj Barack Obama-s, duke pretenduar se përpara se të zgjidhej president i ishin përgjuar bisedat telefonike nga parardhësi.
Akuzat e përcjella përmes Twitter-it u shoqëruan me një hedhje poshtë të tyre nga zëdhënësi i ish-presidentit, por dhe një nga ish-këshilltar i tij.
Tani është drejtori i FBI-së, James Comey, që u kundërvihet akuzave të Trump-it, duke i kërkuar Departamentit të Drejtësisë t’i hedhë poshtë publikisht ato.
BBC-ja u referohet mediave amerikane kur thotë se James Comey beson se nuk ka asnjë provë në mbështetje të akuzave të kreut të Shtëpisë së Bardhë.
Departamenti Amerikan i Drejtësisë nuk ka reaguar ende, ndërkohë që FBI-ja nuk ka pranuar të bëjë komente mbi raportimet e fundit.
Shtëpia e Bardhë i kërkoi Kongresit të dielën që të hetonte mbi akuzat për përgjim të Trump-it. James Clapper, drejtori i inteligjencës kombëtare në administratën e Obama-s, mohoi plotësisht që të kishte pasur diçka të ngjashme me pretendimet e presidentit aktual. /tesheshi.com/
