Marrëdhëniet mes Turqisë dhe Austrisë kanë njohur një tensionim të shtuar pas përpjekjes së dështuar për grusht shteti më 15 korrik. Austria është një nga ato vende nga të cilat nuk ka patur një reagim pozitiv ndaj autoriteteve legjitime në Turqi pas ngjarjeve të fundit dramatike.
Kancelari austriak Christian Kern do të lajmëronte dy ditë më parë nisjen e një diskutimi me kryetarët e qeverive europiane për t’i ndërprerë me Turqinë negociatat për anëtarësim në BE.
“Ne duhet të përballemi me realitetin,” deklaroi ai. “Negociatat e anëtarësimit janë aktualisht jo më shumë se fantazi.”
Mevlyt Çavushogllu, ministri i Jashtëm i Turqisë, i ka quajtur sot të shëmtuara komentet e kancelarit austriak, duke i hedhur poshtë ato.
Në një televizion turk, në TGRT Haber, Çavushogllu do të thoshte, “Kancelari austriak duhet të shohë së pari vendin e tij. Një nga tendencat armike të të drejtave të njeriut dhe të vlerave njerëzore është racizmi, dhe sot Austria është kryeqyteti i racizmit radikal.”
Reagimi i autoriteteve austriake ka qenë i menjëhershëm. Ministri i Jashtëm, Sebastian Kurz, i kërkoi Ankarasë të zbusë fjalët dhe qëndrimet.
Kjo është përplasja më e fundit verbale mes përfaqësuesve të dy vendeve. Ambasadorit turk në Austri do t’i kërkoheshin shpjegime më 21 korrik për lidhjet e Ankarasë me manifestimet në vend në mbështetje të Erdoganit. Një ditë më vonë, kryebashkiaku i një qyteti të vogël austriak kërkoi nga bashkësia turke aty që t’i hiqte nga ballkonet flamujt turq. Ndërsa sot mediat turke bëjnë të njohur se Austria u ka bërë strehë shumë institucioneve të lidhura me Organizatën Terroriste Gyleniste, FETÖ. /tesheshi.com/
