Një studim i kohëve të fundit ka dalë në përfundimin se njerëzit që rrinë zgjuar deri vonë për shkak të punës, pa një orar të përcaktuar, e rrezikojnë maksimalisht shëndetin e tyre.
Studimi në fjalë, i kryer nga një grup kërkuesish të Surrey and Northwestern University, Chicago, tregon se njerëzit që punojnë netëve të vona, kanë rrezik të vdesin më shpejt sesa ata që e bëjnë punën përgjatë orëve të mëngjesit. Shkalla e vdekshmërisë tek të parët është rreth 10% më e lartë sesa tek të dytët.
Më herët është bërë e ditur se fjetja më pak sesa orët e nevojshme dhe nisja e punës në orët e para të ditës, rrisin rrezikun e sëmundjeve të zemrës. Ndërsa studimi më i ri ka zbuluar se çrregullimet e shëndetit mendor dhe diabeti janë më të përhapur te personat që rrinë zgjuar natën vonë, dhe se mungesa e gjumit mund të shkaktojë varësi ndaj alkoolit dhe drogës tek ata.
“Kjo problematikë e shëndetit publik nuk mund të injorohet më!”, thotë Malcolm von Schantz, profesor i kronobiologjisë në universitetin e Surrey-t. “Ne duhet t’u krijojmë mundësinë tipave të natës që ta fillojnë dhe ta mbarojnë punën më vonë sesa të tjerët.”
Ndërsa Kristen Knutson, profesor i asociuar në universitetin e mjekësisë Northwestern University Feinberg, thotë se tipat e natës e kanë tepër të vështirë që t’i bëjnë ballë rutinës së mëngjesit në punë. Sipas tij, kjo gjë mund t’u shkaktojë atyre probleme të rënda shëndetësore. Ndër të tjera, ai thotë: “Njerëzit që rrinë zgjuar natën, nuk duhen detyruar që ta nisin punën në orën 8 të mëngjesit. I këshilloj punëdhënësit që t’i përcaktojnë turnet e punës sipas “kronotipeve” të punonjësve të tyre.”
Studimi në fjalë, i publikuar në revistën shkencore Chronobiology International, pati si objekt mbi 433,000 vetë, të cilëve iu vrojtua rutina, oraret e gjumit dhe gjendja e tyre shëndetësore për rreth 6 vjet e gjysëm. /tesheshi.com/
