Një polic në Shtetet e Bashkuara qëlloi për vdekje një të ri afroamerikan pas një grindjeje mes tyre. Ngjarja ka ndodhur në Teksas e vjen pas një viti nga vrasja e Michael Brown në Ferguson e cila nxiti protesta në Shtetet e Bashkuara dhe rindezi debatin për racizëm.
Policia e Arlingtonit në Teksas ka nisur hetimet për të verifikuar nëse agjenti i saj ka tejkaluar përdorimin e forcës në rastin e të riut afroamerikan.
I riu 19-vjeçar akuzohej për një vjedhje dhe pas një grindjeje, polici ka qëlluar. Christian Taylor u qëllua ndërsa policët i ishin përgjigjur thirrjes për vjedhje në një koncensionar makinash.
Kjo ngjarje pritet t’i hedhë edhe më shumë zjarr benzinës, ndërsa në Ferguson janë planifikuar protesta gjatë fundjavës për përvjetorin e parë të vrasjes së adoleshentit me ngjyrë Michael Brown.
Misuri përjetoi ditë të tëra trazirash pas vrasjes së tij më 9 Gusht të një viti më parë dhe u shndërrua në vatër të debatit kombëtar për racizëm në forcat e policisë.
Aktivistët planifikojnë disa aktivitete e protesta me anë të të cilave kërkohet edhe ndryshime të mëdha në sistemin e drejtësisë amerikane. /tesheshi.com/
