Nuk është ende përfundimtar bilanci tragjik i sulmit me armë që përhapi terror dhe panik në Dallas të Teksasit. Të paktën 4 agjente të policisë janë vrarë dhe 7 të tjerë janë plagosur. Në qytet po manifestohej duke u protestuar kundër dhunës së policisë mbi afro-amerikanët.
Situata doli nga kontrolli në momentin që disa snajper u drejtuan ndaj policisë gjatë kohës së protestës, duke shkaktuar 4 të vrarë e duke plagosur rëndë disa të tjerë.
Dy persona janë arrestuar deri më tani në lidhje me ngjarjen. Njëri prej tyre është dorëzuar vetë ndërsa tjetri u arrestua nga policia.
Aktualisht policia po negocion me një tjetër të dyshuar, i cili ndodhet në një parking makinash dhe po kërcënon se do të sulmojë sërish.
Gjatë momentit që policia iu afrua zonës, personi në fjalë mësohet të ketë hapur zjarr kundrejt oficerëve. I dyshuari ka thënë gjithashtu se ka një sasi të madhe eksplozivi dhe se do ta aktivizojë lëndën plasëse në rast se policia do të afrohet.
Autoritetet raportojnë se hetuesit po marrin në pyetje personat e ndaluar, por në bazë të komunikatës së tyre, ata nuk po bashkëpunojnë për të ndihmuar në zbardhjen e kësaj ngjarjeje. /tesheshi.com/
