Uashingtoni i ka kërkuar Prishtinës që të heq me patjetër taksën doganore ndaj Serbisë. Me anë të një deklarate nga Ambasada Amerikanë, sqarohet se kjo masë duhet të marrë fund nëse Kosova vërtet dëshiron të ruajë partneritetin me SHBA
“Disa komentatorë dhe politikanë sugjeruan që statusi i Kosovës si shtet i pavarur dhe sovran, dhe e lidhur ngushtë me Shtetet e Bashkuara, do ta mbrojnë atë nga gjitha pasojat e vendimeve në arenën ndërkombëtare. Ne tërheqim vërejtjen kundër konstatimeve se Kosova ose cilido mik i SHBA-së mund ndërmarrin veprime që shkojnë kundër interesave tona strategjike, pa u përballur me pasoja në marrëdhëniet tona bilaterale. Ne ritheksojmë pikëpamjen tonë se një pezullim të menjëhershëm të tarifës në importet nga Serbia dhe Bosnja është një masë e nevojshme për të rimëkëmbur procesin e dialogut.
Sikurse ka treguar edhe historia e re, Kosova është e suksesshme kur bashkohet nga brenda dhe hyn në partneritet me Shtetet e Bashkuara dhe BE-në. Ne inkurajojmë të gjitha partitë politike që të kontribuojnë në mënyrë konstruktive në këtë proces. Veprimet që minojnë dialogun dhe refuzimi për të pezulluar tarifat shkojnë kundër interesave të SHBA-ve”, thuhet në deklaratë.
Ka reaguar Haradinaj, mbi të cilin bie bara e rëndë e përgjigjes ndaj këtij ultimatumi. I pari i qeverisë së Prishtinës ka mbrojtur tezën e njohur të “njohjes si kush për heqjen”, por pa qenë kategorik.
“Marrëdhëniet ekonomike Kosovë-Serbi janë të rëndësishme, ndonjëherë kanë me u rregullua, por duhet me iu pri edhe marrëdhëniet politike, pra pa një marrëveshje politike Kosovë-Serbi është zor me i mbajtur të rregulluara marrëdhëniet tjera. Ne jemi të hapur, pra jemi të interesuar me e pezullua taksën nëse ka gatishmëri për me u rregullua marrëdhëniet Kosovë-Serbi politike, e që nënkupton edhe njohja e Kosovës pra”, deklaroi Haradinaj. /tesheshi.com/
