SHBA, thirrje nr. 2 për Serbinë: Liro policët kosovarë!

Departamenti Amerikan i Shtetit i bëri thirrje edhe një herë presidentit serb Aleksandar Vuçiç dhe Qeverisë së Serbisë që të lirojnë menjëherë dhe pa kushte tre policët e Kosovës të arrestuar më 14 qershor.

“Arrestimi dhe vazhdimi i ndalimit të tyre me akuza të rreme e kanë përkeqësuar situatën tashmë të tensionuar. Gjithashtu vazhdojmë t’i bëjmë thirrje Serbisë dhe Kosovës që të ndjekin planin trepikësh të paraqitur nga Bashkimi Evropian dhe t’i kthehen pa vonesë dialogut që të çon në BE”, thuhet në deklaratën e Departamentit të Shtetit.

Më 16 qershor, Gjykata e Lartë në Kraljevë urdhëroi ndalimin e tre policëve të Kosovës, të cilët u arrestuan nga policia serbe më 14 qershor në, siç pretendojnë autoritetet, në territorin serb.

Siç ka bërë të ditur MPB-ja serbe, pjesëtarët e grupit policor antiterror kanë gjetur dhe arrestuar tre pjesëtarë të policisë së Kosovës të cilët ishin me mjete të plota ushtarake.

Ministria e Brendshme e Serbisë thotë se policët e saj “nuk e kanë kaluar vijën administrative në asnjë moment”.

Por Policia e Kosovës pretendon se tre pjesëtarë të saj janë “rrëmbyer” nga njësia speciale e policisë serbe, në territorin kosovar, dhe se ata nuk janë forca speciale, por oficerë të patrullës kufitare.

Nga ana tjetër, KFOR oa treguar “paaftësi” për të përcaktuar të vërtetën e rrëmbimit, duke mos u shprehur se në ç’territor ndodhi.

Në fillim, si SHBA e si BE hezituan të kishin një qëndrim, të dënonin rrëmbimin e të deklaroheshin për lirimin e policëve kosovare, por tani, sidomos SHBA, po i mëshon fort kësaj, duke u deklaruar hapur dhe qartë për pafajësinë e të rrëmbyerve. /tesheshi.com/