SHBA i kanë bërë thirrje Serbisë dhe Kosovës që të vazhdojnë dialogun, pasi takimi i liderëve të dy palëve të enjten në Bruksel përfundoi pa rezultat.
Ned Price, zëdhënës i Departamentit të Shtetit, tha në një konferencë për shtyp se Uashingtoni po monitoron nga afër situatën.
“Me sa dimë, bisedimet po vazhdojnë. Në partneritet me Bashkimin Evropian, ne po e ndjekim këtë me kujdes dhe inkurajojmë të dyja palët që ta përdorin dialogun në mënyrë efektive dhe t’i sugjerojmë që ta vazhdojnë atë”, tha ai.
Zyrtari i Departamentit të Shtetit saktësoi se Uashingtoni e mbështet plotësisht dialogun dhe se është e nevojshme të avancohet diskutimi për normalizimin e marrëdhënieve bazuar në tezën e njohjes reciproke.
Price ka thënë se raportuesi special i administratës amerikane për Ballkanin, Gabriel Escobar dhe ambasadori amerikan në BE, Mark Gitenstein, janë duke i monitoruar nga afër bisedimet ndërmjet Kosovës dhe Serbisë.
“Mund t’ju siguroj se dialogu ka vëmendjen e plotë të zyrtarëve amerikanë. Është një çështje me të cilën vetë Sekretari i Shtetit (Antony) Blinken është marrë për një kohë të gjatë. Është një prioritet që përfshin të gjithë organizatën tonë, si në terren ashtu edhe në SHBA”, tha Price.
Shefi i politikës së jashtme dhe sigurisë së BE-së, Josep Borrell, tha më herët se të dyja palët nuk kishin arritur një marrëveshje për targat dhe dokumentet hyrëse-dalëse.
Ai ka treguar megjithatë se negociatorët, kryeministri i Kosovës Albin Kurti dhe presidenti i Serbisë, Aleksandar Vuçiç, janë pajtuar që bisedimet të vazhdojnë edhe në ditët në vijim. /tesheshi.com/
