Skuadra amerikane, e drejtuar nga gjermani Jurgen Klinsmann, ka fituar ndaj Paraguajit, duke shkruar emrin mes tetë më të mirave të Kupës së Amerikës.
Ndeshjet e treta për grupin A në këtë veprimtari janë luajtur në nisje të së dielës. Përfaqësuesja e SHBA-ve e kishte të domosdoshme një fitore për të kaluar grupin, dhe ia ka arritur kësaj.
Ndeshja ndaj Paraguajit ka përfunduar 1-0 për SHBA-të, me golin të realizuar nga Dempsey në minutën e 27-të.
Takimi ka qenë i tensionuar, me nëntë kartonë të verdhë e një të kuq. Yedlin e ka lënë kombëtaren e SHBA-ve me dhjetë lojtarë në minutën e 48-të, pasi ka marrë kartonin e dytë të verdhë, të shndërruar në të kuq.
Paraguaji ka patur zotërimin e lojës, e ka goditur më tepër portën kundërshtare, por nuk ka mundur që ta finalizojë epërsinë.
Kolumbia, që e kishte siguruar më herët kalimin e grupit me dy fitore, ka patur luksin të humbasë në ndeshjen e tretë. Kolumbianët janë mundur 2-3 nga Kosta Rika. Venegas e Borges kanë qenë shënuesit për kostarikanët, përpos një autogoli nga Fabra. I njëjti lojtar kishte shënuar më herët golin e parë për kolumbianët, të pasuar nga një i dytë prej Moreno-s. /tesheshi.com/
