Shtetet e Bashkuara u përballën me kritika në Këshillin e Sigurimit të OKB të premten, për shkak të thirrjes së takimit për të diskutuar protestat e fundit në Iran.
Disa anëtarë argumentuan se ishte një çështje e brendshme e Teheranit, i cili pretendon se demonstratat ishin drejtuar nga jashtë. Por ambasadorja amerikane në OKB, Nikki Haley, ishte sfiduese.
“Ne nuk do të jemi të qetë,” tha ajo në takim.
“Asnjë përpjekje e pandershme për t’i quajtur protestuesit ‘marioneta të fuqive të huaja’ nuk do ta ndryshojë këtë. “Populli iranian e di të vërtetën dhe e dimë të vërtetën, asgjë nuk do t’i ndalë amerikanët të qëndrojnë në solidaritet me ta”.
Megjithatë, ambasadori francez i OKB Francois Delattre argumentoi se protestat nuk kërcënojnë paqen dhe sigurinë ndërkombëtare, duke thënë: “Duhet të jemi të kujdesshëm ndaj çdo përpjekjeje për ta shfrytëzuar këtë krizë për qëllime personale.”
Për ambasadorin e Rusisë në OKB, Vassily Nebenzia, takimi ishte një përpjekje për të minuar marrëveshjen bërthamore të Iranit, të cilën e kundërshton Presidenti Donald Trump. Nebenzia pyeti:
“Pse Shtetet e Bashkuara, një anëtare e përhershme e Këshillit të Sigurimit dhe një nga autorët e Kartës së OKB-së, po minojnë autoritetin e Këshillit të Sigurimit si organi kryesor përgjegjës për ruajtjen e paqes dhe sigurisë ndërkombëtare?”
Ministri i Jashtëm iranian Javad Zarif shkroi në llogarinë e tij të Twitter se takimi ishte “një gabim tjetër i politikës së jashtme për administratën e Trump”.
Protestat shpërthyen në Iran një javë më parë pasi qeveria njoftoi planet për të rritur çmimet e karburantit dhe për të shkurtuar pagesat mujore të parave të gatshme për iranianët me të ardhura të ulëta. Trazirat u përhapën në mbi 80 qytete dhe rezultuan me 22 vdekje dhe më shumë se 1,000 arrestime, sipas zyrtarëve iranianë. /tesheshi.com/
