John Kerry, sekretari amerikan i Shtetit, u shpreh në përvjetorin e katërt të konfliktit sirian se Uashingtoni dhe aleatët po shqyrtojnë mundësitë për ta kthyer Beshar Esadin në tavolinë.
Në një intervistë të transmetuar të dielën te CBS News, nga Kerry nuk u përsëritën fjalët standarde se Esadi e ka humbur legjitimitetin dhe duhet ta lërë pushtetin.
“Në fund na duhet të negociojmë”, u shpreh Kerry. “Ne kemi qenë gjithmonë të gatshëm të negociojmë në kontekstin e procesit të Gjenevës”, bëri të ditur ai, duke iu referuar konferencës së vitit 2012, e cila kërkoi një tranzicion të negociuar për t’i dhënë fund konfliktit.
Sekretari amerikan i Shtetit theksoi se SHBA-të dhe vende të tjera, të cilat nuk i përmendi me emër, po shihnin rrugët për ta rindezur procesin diplomatik në kërkim të dhënies fund konfliktit, që tashmë është në vitin e pestë të tij.
Por zëdhënësja e Departamentit të Shtetit, Marie Harf, tha më vonë se Kerry nuk po i referohej në mënyrë specifike Esadit. Ajo përsëriti se Uashingtoni nuk do të negociojë kurrë me udhëheqësin sirian.
Harf shtoi se, “Ka qenë gjithmonë e nevojshme që përfaqësues të regjimit të Esadit të jenë pjesë e këtij procesi. Nuk ka qenë dhe nuk do të jetë kurrë Esadi që do të negociojë. Sekretari nuk po thoshte sot këtë.”
SHBA-të ishin në vitin e shkuar në krye të përpjekjeve për organizimin e bisedimeve paqësore në Gjenevë, të mbështetura nga OKB-ja, midis përfaqësuesve të opozitës siriane dhe një delegacioni qeveritar të Sirisë. Mjaftuan vetëm dy raunde që bisedimet të ngecnin, dhe që atëherë nuk janë planifikuar më takime të përbashkëta. /tesheshi.com/
