Në Europë vëmendja është përqendruar te Euro 2016-ta, por në anën tjetër të botës vijon një turne po kaq i rëndësishëm, Kupa e Amerikës. Sigurisht që eliminimet e Uruguajit dhe Brazilit kanë lënë një zbrazëti, por dhe e kanë bërë më surprizues aktivitetin.
SHBA-të janë bërë në orët e para të kësaj dite skuadra e parë gjysmëfinaliste e Kupës së Amerikës. Amerikanët e Jurgen Klinsmann-it kanë fituar 2-1 ndaj Ekuadorit në çerekfinale, duke bërë përpara.
Ata do ta nisnin keq turneun, duke humbur 0-2 me Kolumbinë më 4 qershor, për të përfunduar të parët më pas në grupin A.
I tensionuar dhe fort i luftuar ka qenë takimi ndaj Ekuadorit, me nga një karton të kuq për secilën skuadër në pjesën e dytë.
Dempsey do të shënonte fillimisht për SHBA-të në minutën e 22-të, e Zardes do ta thellonte rezultatin në fraksionin e dytë të lojës.
Ekuadori do të niste të ushtronte presion më tutje, por do të shënonte vetëm një herë. Arroyo do të ngushtonte rezultatin në minutën e 74-t.
Kjo ishte fitorja e katërt e SHBA-ve në një fazë me eliminim të një turneu të madh. Dempsey qe lojtari i ndeshjes, duke shënuar në të tretën ndeshje radhazi të përfaqësueses së tij.
Amerikanët presin fituesin e çerekfinales Argjentinë – Venezuelë për të mësuar rivalin e tyre në gjysmëfinale. /tesheshi.com/
