Administrata amerikane ka lajmëruar për shitjen e një sasie të konsiderueshme armatimi Tajvanit, në një vlerë prej 1.83 miliardë dollarësh.
Për herë të parë që nga viti 2011, kjo shitje parashikon ta furnizojë Tajvanin me transportues të blinduar, me raketa antitanke, me dy fregata, si dhe me pajisje të tjera ushtarake.
Kina, nga ana e saj, që e quan Tajvanin pjesë të territorit të vet, ka protestuar ndaj vendimit të administratës amerikane, duke e quajtur atë ndërhyrje në punët e brendshme, dhe duke kërkuar pezullimin e shitjes së armëve për të shmangur dëmtimin e marrëdhënieve me SHBA-të.
Departamenti i Shtetit e njoftoi të mërkurën Kongresin për shitjen, dhe ky i fundit ka 30 ditë kohë për ta rishikuar atë. Megjithatë, nuk pritet që të ketë kundërshti për shitjen e armëve.
Zëdhënësi i Departamentit të Shtetit, John Kirby, tha në një dalje para gazetarëve se SHBA-të ishin në kontakt për shitjen e armëve si me Tajvanin dhe me Kinën, e se shitja nuk kishte arsye për të patur efekt cenues në marrëdhëniet me Kinën.
“Ne ende duam të ndërtojmë një marrëdhënie më të mirë, më transparente dhe më efektive me Kinën në rajon,” u shpreh ai.
Krejt ndryshe qe reagimi i sotëm i Ministrisë së Jashtme kineze, që lëshoi paralajmërimin se shitja e armëve kërcënon marrëdhëniet me SHBA-të. /tesheshi.com/
