“Këshilli i Sigurimit të OKB-së nuk duhet të lejojë që civilët nga të dy anët e qytetit të ndarë sirian të Halepit të mbeten pa ndihmë humanitare,” kanë porositur SHBA-të, ndërkohë që Rusia po e akuzon Uashingtonin për politizim të kësaj çështjeje humanitare.
SHBA-të, Britania, Franca, Zelanda e Re dhe Ukraina kanë organizuar një takim joformal të Këshillit të Sigurimit mbi Halepin, ku kanë raportuar një aktivist i “Helmetave të bardha”, si dhe dy mjekë të Shoqatës Mjekësore Siriano-Amerikane, të cilët janë kthyer së fundi nga qyteti sirian.
“Nëse luftimet vazhdojnë, mundet që civilët në të dy anët e Halepit të mbeten pa ndihmat bazë për të cilat kanë nevojë. Ne nuk mund ta lejojmë këtë të ngjasë”, ka thënë përfaqësuesja amerikane në OKB.
Ambasadorja amerikane në OKB, Samantha Power, duke iu referuar të dhënave të OKB-së, ka thënë se forcat qeveritare janë përgjegjëse për gati 80% të zonave të rrethuara përgjatë gjithë territorit të Sirisë.
Halepi është ndarë midis forcave qeveritare dhe atyre rebele që nga vera e vitit 2012, ka kujtuar agjencia e lajmeve Reuters.
“Sërish i bëjmë thirrje Rusisë që ta shfrytëzojë ndikimin e saj dhe t’i bëjë presion regjimit sirian që një herë e përgjithmonë t’u japë fund rrethimeve në Siri,” ka thënë Power.
Zëvendësambasadori rus në OKB, Vladimir Safronkov, i ka akuzuar ndërkohë SHBA-të dhe partnerët perëndimorë se po e politizojnë çështjen humanitare, dhe ka bërë thirrje që të “pranojnë se shkak kryesor i të gjitha problemeve humanitare në Siri nuk janë aksionet kundraterroriste të qeverisë legjitime të Sirisë”. /tesheshi.com/
