Në kundërpërgjigje ndaj Koresë së Veriut dhe veprimtarisë së saj të shtuar ushtarake në fushën raketore, Shtetet e Bashkuara të Amerikës kanë dislokuar një bateri shtesë raketash Patriot në Korenë e Jugut.
Dislokimi i kësaj baterie shtesë është bërë pikërisht para nisjes së bisedimeve për ngritjen e një sistemi mbrojtës më të sofistikuar nga ana e SHBA-ve.
Komanda ushtarake amerikane në Korenë e Jugut njofton se një njësi e mbrojtjes ajrore po kryen stërvitje në bazën ajrore të Osanit duke përdorur sistemin Patriot.
Thomas Vandal, një prej ushtarakëve të lartë, deklaroi se manovra si këto garantojnë gatishmërinë për t’u mbrojtur nga një sulm prej Koresë së Veriut.
“Zhvillimi i vazhdueshëm i raketave balistike nga Koreja e Veriut kundër vullnetit të bashkësisë ndërkombëtare kërkon që aleanca ta ketë gati mbrojtjen raketore,” tha mes të tjerash Vandal në një deklaratë.
Një provë bërthamore një muaj më herët dhe lëshimi para pak ditësh i një rakete me rreze të gjatë nga ana e Koresë së Veriut e kanë tensionuar situatën në rajon, duke sjellë dhe reagimin e SHBA-ve. /tesheshi.com/
