Ka trazuar ujërat vrasja e dy serbëve që ishin marrë peng nga një grup pranë ISIS-it në Libi. Ata u vranë gjatë një sulmi ajror amerikan. Vdekjen e dy serbëve e lajmëroi vetë kryeministri Aleksandër Vuçiç. Por Departamenti Amerikan i Mbrojtjes nuk ka ofruar asnjë të dhënë mbi vrasjen nga një sulm ajror të dy serbëve në Libi.
Serbia ka kërkuar menjëherë shpjegime nga autoritetet amerikane dhe ato të Libisë. Ministri i Jashtëm, Ivica Daçic, ka reaguar i irrituar, duke thënë se asnjë nga Uashingoni nuk ka kontaktuar me Serbinë për këtë çështje. Një notë e ministrisë së Jashtme së Serbisë është dërguar në Departamentin e Shtetit për të kërkuar sqarime më të plota.
Pentagoni bëri të ditur se ka pasur një sulm ajror kundër një baze të ISIS-it në Sabratha, ku ndodhej një celulë e rrezikshme, që kishte dorë në aktet terroriste në Tunizi. Gjatë sulmit në kampin e stërvitjes janë vrarë 40 persona, por nuk ka të dhëna mbi serbët.
Kreu i shërbimit sekret serb, BIA-s, Ivan Todorov, deklaroi se spiunazhi serb ka dijeni për grupet që i kanë marrë peng, e shërbimet partnere e dinin vendodhjen e pengjeve serbë. “Autoritetet amerikane duhet të na japin më shumë informacion,” ka kërkuar ai.
Viktima të sulmit janë diplomatja Sladjana Stankoviç dhe shoferi Jovica Stepiç, që u morën peng në Sabratha në nëntor të 2015-ës.
Ndërkohë, zëdhënësi i Pentagonit, Peter Cook, deklaroi prerë se, “është konfirmuar se të vrarët nuk janë civilë”. Pentagoni bëri të ditur me anë të një njoftimi me shkrim se dy shtetas serbë gjetën vdekjen gjatë një sulmi ajror të amerikanëve ndaj një baze stërvitjeje të një grupi pranë ISIS-it.
“Në kohën e sulmit nuk ka pasur shenja se në kamp gjenden dhe civilë. Edhe pse rrethanat e vdekjes së tyre mbeten të paqarta, ne u shprehim ngushëllimet tona më të thella qeverisë së Serbisë dhe familjeve të të vrarëve,” tha Cook.
Ai shtoi se të gjitha informatat do të ndahen me qeverinë serbe. /tesheshi.com/
