Presidenti amerikan Joe Biden dhe bashkëshortja e tij Jill Biden, një profesoreshë universiteti që vazhdon aktivitetin e saj, patën të ardhura prej 579,514 dollarë dhe paguan taksa prej 169,820 dollarë në 2022 – në masën 23,8 për qind, njoftoi të martën Shtëpia e Bardhë.
“Me këtë njoftim, presidenti Biden ka bërë publike deklaratat e tij tatimore për një total prej 25 vitesh”, thuhet në njoftimin për shtyp të presidencës amerikane.
Njoftimi këmbëngul në “angazhimin për transparencë” të politikanit 80-vjeçar demokrat, një koment jo aq i pafajshëm sa tingëllon në klimën aktuale politike.
Joe Biden, i cili premtoi pak ditë më parë se së shpejti do të zyrtarizojë kandidaturën e tij për rizgjedhje në vitin 2024, ka të ngjarë të përballet sërish me paraardhësin e tij Donald Trump.
Republikani, i cili ka sfiduar traditën e transparencës së Shtëpisë së Bardhë për çështjet e taksave, po lufton fort – duke përfshirë edhe gjykatat – që të mos publikohen deklaratat e tij tatimore.
Megjithatë, një komitet i Dhomës së Përfaqësuesve të SHBA-së, votoi në dhjetor për të nxjerrë deklaratat tatimore të manjatit të pasurive të paluajtshme nga 2015 deri në 2020.
Ata zbuluan se Trump pagoi vetëm 750 dollarë taksa në 2017, vitin e tij të parë në Shtëpinë e Bardhë, më pas rreth një milion në 2018 dhe 2019, dhe se rezultati në deklaratën e tij tatimore ishte… zero në 2020.
Bidenët dhuruan 20,180 dollarë në vitin 2022 (afërsisht 3.5% e të ardhurave të tyre) për njëzet organizata bamirëse, duke përfshirë një të lidhur me sindikatat e policisë.
Nënpresidentja Kamala Harris dhe bashkëshorti i saj Doug Emhoff raportuan të ardhura prej 456,918 dollarë në vitin 2022, sipas Shtëpisë së Bardhë. /tesheshi.com/
