Në një reagim ironik, SHBA-të i bënë thirrje presidentit rus Vladimir Putin që të pranojë realitetin e konfliktit në Ukrainë dhe të tërheqë trupat e tij pasi foli për “luftë” – një fjalë e ndaluar në Rusi – në një konferencë për shtyp të enjten.
Pushtimi rus i Ukrainës është quajtur zyrtarisht një “operacion ushtarak special” nga Kremlini. Autoritetet ruse kanë prezantuar një ligj që parashikon dënime të rënda me burg për publikimin e çdo informacioni në lidhje me ushtrinë ruse që konsiderohet “i rremë” dhe shumë njerëz janë dënuar pasi e kanë quajtur pushtimin “luftë”.
Megjithatë, Putin e përdori këtë fjalë të enjten, duke pohuar se ai dëshiron që konflikti në Ukrainë të përfundojë “sa më shpejt të jetë e mundur”.
“Që nga 24 shkurti, SHBA dhe pjesa tjetër e botës e kanë ditur se operacioni ushtarak special ishte një luftë e paprovokuar dhe e pajustifikuar kundër Ukrainës”, tha një zëdhënës i Departamentit të Shtetit. “Më në fund, pas 300 ditësh, Putini e quajti luftën me emrin e saj”, shtoi ai. “Si një hap tjetër në njohjen e realitetit, ne i bëjmë thirrje atij që t’i japë fund luftës duke tërhequr trupat e tij nga Ukraina.”
“Sulmi i Rusisë ndaj sovranitetit të vendit të saj fqinj ka shkaktuar vdekje, shkatërrim dhe zhvendosje të popullsisë”, cilado qoftë terminologjia që përdor Putini, vazhdoi zëdhënësi.
Një këshilltar rus, Nikita Yuferev, njoftoi të enjten se po e çonte Putinin në gjykatë, duke e akuzuar atë për “përhapje të informacionit të rremë” për përdorimin e fjalës “luftë” për të përshkruar operacionet në Ukrainë. Apeli i Yuferev-it nuk ka asnjë shans të pranohet nga autoritetet gjyqësore, për arsyen shtesë se përmban shumë gabime, si data e fjalimit të Putinit dhe madje edhe emri i vetë presidentit, siç e kishte shkruar dikur sikur të ishte femër. /tesheshi.com/
