SHBA-të dhe BE-ja u kërkojnë shqiptarëve të Malit të Zi që të jenë faktor i mosrrëshqitjes së vendit të vogël ballkanik në anën e Rusisë.
Siç mësohet, këto ditë janë zhvilluar disa takime të rëndësishme të grupimeve politike shqiptare me drejtues të njohur politikë në Shqipëri dhe në Kosovë, të cilët kanë marrëdhënie me drejtuesit e partive e ndikim mbi ta.
Mali i Zi, sipas të gjitha gjasave, po përgatitet për një referendum mbi dilemën në duhet të bëhet pjesë e NATO-s apo jo. Në rastin e pavarësisë në vitin 2006, 55% e atyre që votuan ishin pro, mirëpo sot nuk është më ai entuziazëm, si për shkak të pakënaqësisë ndaj partisë në pushtet, e cila nuk ndryshon asnjëherë, ashtu edhe si pasojë e ekzistencës së partive filoserbe dhe filoruse.
Shqiptarët kanë patur rol jetik në referendum, dhe atëherë u thirrën edhe emigrantë nga SHBA-të dhe Australia, të ardhur posaçërisht.
Ditët e fundit u bë një provë paraprake, ku vota e shqiptarëve ishte vendimtare. Partia në pushtet, PDS-ja e Gjukanoviçit, shkarkoi kryetarin e Parlamentit, Krivokapiçin, pasi ish-aleati është bashkuar me filorusët dhe e kundërshton anëtarësimin e Malit të Zi në NATO. Kryeministri Gjukanoviç tentoi një provë force, dhe pati sukses me votat e shqiptarëve dhe boshnjakëve.
Ndaj kjo duket se do të jetë edhe strategjia e ardhshme e grupit properëndimor në Mal të Zi, ku koalicioni tresh, ndërmjet Gjukanoviçit, shqiptarëve dhe boshnjakëve, do të përbëjë triumviratin pro integrimit në NATO.
Ambasada amerikane, dhe disa diplomatë perëndimorë, kanë nisur një seri takimesh me politikanët shqiptarë dhe me njerëzit me ndikim, në mënyrë që i gjithë faktori politik të bashkohet dhe të ketë një zë. Ndërkaq, ajo është bërë dhe ndërmjetëse për t’i dërguar kërkesat e shqiptarëve te Gjukanoviçi, për të patur një përmirësim të lirive dhe të drejtave të njeriut, të cilat gjithsesi shkelen nga qeveria në shumë aspekte. /tesheshi.com/
