SHBA sanksionon njeriun e “botës serbe”

SHBA ka sanksionuar drejtorin e Agjencisë për Siguri dhe Informacion të Serbisë, Aleksandar Vulin.

“Me këtë vendim, Aleksandar Vulin mbahet përgjegjës për akte korruptive dhe destabilizuese që mundësuan edhe aktivitetet malinje të Rusisë në rajon”, thuhet në shpjegim.

“Sanksionet kundër Aleksandar Vulin nënvizojnë vendosmërinë e Shteteve të Bashkuara të Amerikës për të mbajtur përgjegjës ata të përfshirë në praktika korruptive që promovojnë axhendat e tyre politike dhe interesat personale në kurriz të paqes dhe stabilitetit në Ballkanin Perëndimor”, thuhet në deklaratë, duke shtuar se “Këto praktika korruptive lehtësojnë aktivitetet dashakeqe ruse në Serbi dhe rajon”.

Sipas SHBA, kreu i shërbimit të inteligjencës serbe, Vulin, është i përfshirë në “krimin e organizuar ndërkombëtar, tregtinë e paligjshme të drogës dhe abuzimin e detyrës publike”.

Thuhet se ai mbajti marrëdhënie me tregtarin serb të armëve Slobodan Teshiç, duke ndihmuar dërgesat e tij të paligjshme të armëve të lëviznin lirshëm nëpër kufijtë e Serbisë.

Sanksionet synojnë të ngrijnë çdo pasuri që Vulin mund të ketë nën juridiksionin e SHBA dhe të ndalojë amerikanët ose kompanitë dhe institucionet amerikane, përfshirë bankat që operojnë në SHBA, të kryejnë transaksione me të.

Aleksandar Vulin, ish-bashkëpunëtor i gruas së Slobodan Millosheviçit, Mirjana Markoviç, është sot një partner koalicioni i Partisë Progresive Serbe (SNS) në pushtet dhe një bashkëpunëtor i ngushtë i presidentit Aleksandar Vuçiç.

Sanksionet e SHBA-së vijnë pak më shumë se dy muaj pasi Parlamenti Evropian shprehu gjithashtu shqetësim për emërimin e Vulin në krye të Inteligjencës serbe (BIA) në dhjetor 2022. Brukseli paralajmëroi kundër retorikës së tij anti-evropiane dhe pro-Kremlinit.

Vulin gjithashtu mbron idenë e një “bote serbe” ose bashkimin e të gjithë serbëve nga Ballkani Perëndimor, gjë që mund të shkaktojë konflikte të reja në atë vend. /tesheshi.com/