Ambasadori amerikan në Serbi, Christopher Hill, ka thënë se ky shtet duhet t’i bashkohet sanksioneve ndërkombëtare kundër Rusisë, duke vlerësuar se është në interes të saj sepse qëndrimet e Beogradit dhe Brukselit ndaj Moskës ndryshojnë.
“E keqja duhet të kundërshtohet dhe Bashkimi Evropian po e bën këtë”, tha Hill në Asamblenë e Përgjithshme të Odës Ekonomike Amerikane në Serbi.
Hill, duke vënë në dukje se qytetarët serbë kanë përvojë me sanksionet ndërkombëtare, tha se ka dallime mes BE-së dhe Serbisë, një prej të cilave është refuzimi i Beogradit për të vendosur sanksione ndaj Moskës.
“Është e nevojshme që Serbia të punojë në përputhje me interesat e saj dhe të anëtarësohet në BE. Serbia ka të drejtë të dëshirojë të anëtarësohet në BE”, vuri në dukje Hill, duke shtuar se procesi i anëtarësimit në Bashkimin “kërkon durim”.
Busulla morale
Diplomati amerikan beson se “busulla morale” e Serbisë duhet të drejtohet drejt Perëndimit sepse Serbia është pjesë e Evropës. Zgjidhjen e çështjes së Kosovës ai e sheh si çështje të rëndësishme jo vetëm për Beogradin dhe Prishtinën, por edhe për BE-në.
Ai përkujtoi se edhe pas një dekade nga nënshkrimi i Marrëveshjes së Brukselit (në prill 2013), projekti i formimit të komunitetit të komunave serbe në Kosovë nuk ka përfunduar, duke shtuar se arritja e marrëveshjes varet nga mundi, këmbëngulja dhe kreativiteti i Beogradit dhe Prishtinës.
Për Beogradin, formimi i ZSO-së është një pikë kyçe për vazhdimin dhe përparimin e dialogut me Kosovën, ndërsa autoritetet kosovare këtë asociacion e shohin vetëm pas njohjes reciproke, por jo si monoetnike, por në përputhje me Kushtetutën e Kosovës.
Të mërkurën në mbrëmje Hill u tha biznesmenëve se interesi i investitorëve të huaj dhe Uashingtonit është një Serbi më e fortë dhe më e qëndrueshme. E ardhmja e Serbisë është anëtarësimi në BE, nuk ka alternativë, theksoi ambasadori amerikan. /tesheshi.com/
