Departamenti Amerikan i Mbrojtjes ka publikuar një video ku paraqet “invazionin” e një avioni bombardues rus “Su-24” mbi një anije amerikanë në ujërat e Balltikut.
Pentagoni bëri të ditur se anija “Donald Cook”, po udhëtonte për të marrë pjesë në stërvitjen e përbashkët me ushtrinë polake së bashku me helikopterët e kësaj armate.
Një incident tjetër ka ndodhur dy ditë më parë, menjëherë sapo anija ka lënë portin e Gdynia-s, ndërkohë që avioni rus nuk ka qenë i pajisur me bombë, fakt ky i pikasur nga radarët e anijes, drejtuesit e së cilës bënë të ditur në komunikim me eprorët se nuk ka një rrezik për ta.
Por një ditë më pas, mbi anije ka fluturuar shtatë herë një helikopter rus i tipit “KA-27”/ Helikopteri ka fluturuar ulët në ujëra ndërkombëtare, ndërsa 40 minuta më vonë dy avionë rusë të tipit SU-24 ndërmorën 11 inkursione në lartësi të ulët.
Sipas ushtrisë amerikane, “manovra e avionit rus ishte tipikisht një simulim sulmi ushtarak”. Incidenti është cilësuar si “më agresivin të ndodhur prej shumë kohësh”.
Ndërkaq zëdhënësi i Ministrisë së Mbrojtjes ruse, gjenerali Igor Konashenkov, u kundërpërgjigj duke thënë se anija e SHBA ishte vetëm 70 kilometera nga baza detare ruse, nga ku u ngritën avionët Su-24 dhe se kundërpërgjigja e flotës ruse ka respektuar ligjet ndërkombëtare kur udhëtohet në ujëra ndërkombëtare.
Ndërkohë televizioni rus në gjuhën angleze R|T, ka akuzuar Pentagonin se po e bën gjë të madhe, një veprim që pilotët rusë e kanë bërë duke zbatuar thjeshtë protokollin e sigurisë së tyre./tesheshi.com/
