Një tjetër luftë ndërmjet Uashingtonit dhe Moskës është konsumuar në Beograd, duke pasur si element dërgimin e një trupe ushtarake serbe në Siri përkrah forcave ruse, ku këto të fundit nuk kanë aleatë ndërkombëtarë në mbrojtjen e presidentit sirian, Bashar al Asad.
Siç bën të ditur gazeta serbe Blic, SHBA ka ndërhyrë tek qeveria serbe në mënyrë që kjo e fundit të heqë dorë nga dërgimi i një grupi xhenierësh minakërkues në Siri.
Por sipas amerikanëve, ekzistonin gjasat që në kuadrin e trupave serbe të rreshtoheshin dhe detashmente sekrete që mund të dërgoheshin në prapavijat e trupave opozitare në Siri.
Televizioni serb B92, thekson se ambasadori amerikan në Beograd, Kyle Scott, ka takuar menjëherë ministrin serb të mbrojtjes, Alexandër Vulin dhe ka kërkuar që të ndalohet dërgimi i kompanisë serbe në Siri.
Vetë Presidenti Aleksandër Vuçiç, deklaroi më pas në një intervistë televizive se “kam presione gjithandej, por ta dinë të gjithë se jemi vend sovran dhe vendimet i marrim në mënyrë të pavarur”.
Ndërkaq, për të kamufluar këtë problem me një pretekst zyrtar, pra mosdërgimin e trupave serbe përkrah ushtarëve rusë në Siri, Beogradi shpalli paaftësinë e deminuesve serbë dhe ka nisur një program trajnimi me amerikanët.
Një brigadë deminuesish nga SHBA ka mbërritur në Serbi për të hequr minat e vjetra por edhe ato të kohës së bombardimeve të NATO-s, të vitit 1999.
Pentagoni i ka dhuruar ushtrisë serbe 450 mijë dollarë, si një shenjë bashkëpunimi sa për të futur këmbë trupat amerikane në Serbi. /tesheshi.com/
