Ndihmës Sekretari Amerikan i Shtetit për Çështjet e Lindjes së Afërt, David Schenker do të vizitojë së afërmi Katarin, gjatë një turi rajonal që do të përfshijë gjithashtu Kuvajtin dhe Libanin.
Gjatë një videokonference që mbajti me këtë rast me mediat e rajonit, z. Schenker e konsideroi Shtetin e Katarit si një partner efektiv në luftën ndaj financimit të terrorizmit, dhe deklaroi se përpjekjet, qëndrimet dhe legjislacioni i vendit kontribuojnë në parandalimin e financimit të fenomenit të terrorizmit.
Zyrtari i lartë amerikan deklaroi se Katari është anëtar i rëndësishëm i Koalicionit Global kundër ISIS dhe partner i SHBA-ve në të gjitha nivelet, pasi luan një rol të domosdoshëm në luftën antiterrorizëm. Ai tha se Uashingtoni i vlerëson përpjekjet efektive të Dohas në luftën kundër këtij fenomeni, brenda kornizës së partneritetit dhe marrëdhënieve të bashkëpunimit midis Katarit dhe Shteteve të Bashkuara.
Schenker nënvizoi rëndësinë e bashkëpunimit në fushën ushtarake dhe të sigurisë midis dy vendeve. Ky bashkëpunim kontribuon në vendosjen e paqes në rajonin e Lindjes së Mesme dhe adresimin nga afër e në mënyrë adekuate të çështjeve rajonale. Ai e cilësoi Katarin një aleat të rëndësishëm të Shteteve të Bashkuara, duke theksuar se të dy vendet punojnë krah njëri-tjetrit të gjitha forumet dhe organizatat ndërkombëtare.
Në përgjigje të pyetjes rreth krizës aktuale të Gjirit, Schenker tha se po bëhen përpjekje serioze në nivelet më të larta në Shtetet e Bashkuara, qoftë në Shtëpinë e Bardhë apo Departamentin e Shtetit, për të ulur palët në tryezën e dialogut dhe të gjenden pikat e përbashkëta për zgjidhjen e krizës.
Në këtë kuadër, Schenker tha se kriza aktuale nuk i shërben interesave të vendeve të Gjirit, por interesave të palëve të tjera, dhe theksoi se administrata amerikane po punon fort për zgjidhjen e krizës në një kohë sa më të shpejtë, sepse SHBA-ve i intereson që rajoni të jetë i unifikuar për t’u përballur me sfidat që e rrethojnë. Ai deklaroi se Shtetet e Bashkuara janë të angazhuara në bisedime me të gjitha palët për të hapur hapësirën ajrore dhe rivendosur marrëdhëniet diplomatike midis Katarit dhe vendeve të bllokadës.
David Schenker vlerësoi gjithashtu ndërmjetësimin e Katarit në bisedimet e paqes afgane midis Shteteve të Bashkuara dhe Talibanëve dhe bisedimeve ndër–afgane, çka rezultoi në nënshkrimin e një marrëveshje paqeje gjatë muajit shkurt në Doha. “Katari është një partner i rëndësishëm që shtyn përpara procesin dhe dialogun e paqes në Afganistan. Shtetet e Bashkuara i janë mirënjohëse Katarit për përpjekjet e tij në këtë drejtim” – tha ai.
Nga ana tjetër, Ndihmës Sekretari i Shtetit për Çështjet e Lindjes së Afërt theksoi rëndësinë e Dialogut Strategjik mes Katarit dhe SHBA. Ai tha se dialogu i përbashkët përfshin fushat ekonomike, të sigurisë dhe të mbrojtjes, si dhe investimet dhe bashkëpunimin në arsim, kulturë, shëndetësi, luftën ndaj pandemisë së koronavirusit, krahas diskutimeve në lidhje me çështje rajonale me interes të përbashkët, përfshirë paqen në Afganistan.
Ndihmës Sekretari i Shtetit deklaroi se tregtia midis Katarit dhe Shteteve të Bashkuara është një nga fushat më të rëndësishme në tryezën e Dialogut Strategjik, dhe vuri në dukje se vëllimi i tregtisë midis dy vendeve u rrit me 35% gjatë 2019-s, duke shtuar të dy palët kanë ende për të bërë në të ardhmen për ta bërë rajonin më të qëndrueshëm.
“Këtë vit, do të nënshkruhet edhe një marrëveshje kulturore që të përkojë me Vitin e Kulturës dhe marrëdhëniet midis të dy palëve në këtë drejtim” – shtoi ai.
Duke përmendur bashkëpunimin në fushën e arsimit dhe mundësinë e rritjes së numrit të studentëve katarianë në Shtetet e Bashkuara, ai tha se ky bashkëpunim kontribuon në forcimin e marrëdhënieve midis dy popujve miq.
Ndihmës Sekretari i Shtetit për Çështjet e Lindjes së Afërt tha se gjatë turit rajonal do të ndalet edhe në Liban. Në këtë kontekst, ai falënderoi HH Emirin e Katarit, Sheikh Tamim bin Hamad Al Thani, për mbështetjen dhe ndihmën e rëndësishme katariane dhënë Libanit që nga shpërthimi i portit të Bejrutit.
Ai përsëriti vlerësimin e marrëdhënieve të ngushta mes Uashingtonit dhe Dohas në të gjitha nivelet, gjë që ndihmon rajonin të jetë më i qëndrueshëm dhe i sigurt. Gjithashtu ai vlerësoi përpjekjet humanitare të Katarit kudo në botë dhe rolin e tij të madh në sigurimin e mbështetjes dhe ndihmës për komunitetin humanitar ndërkombëtar.
Në përgjigje të një pyetje nga Agjencia e Lajmeve të Katarit rreth rolit të SHBA-ve në krizat e Lindjes së Mesme, si kriza turko-greke, kriza libiane dhe kriza jemenase, Schenker deklaroi përfshirjen e plotë të vendit të tij në çështjet rajonale, përfshirë edhe konfliktin në Libi.
“Shtetet e Bashkuara po punojnë me partnerët evropianë për zgjidhjen e kësaj krize në përshkallëzim. Kriza libiane është kthyer në një krizë globale pas hyrjes së disa aktorëve rajonalë dhe ndërkombëtarë në konflikt” – vërejti ai dhe u kërkoi të gjitha forcave (të huaja) militare të largohen nga Libia, duke theksuar se vendi i tij është i vendosur në përpjekjet për vendosjen e paqes atje, kryesisht përmes pistës së vendosur në konferencën e Berlinit.
