Pas dështimit të pritshëm të takimit të parë mes Edi Ramës dhe Lulzim Bashës mbi reformën në drejtësi, Shtetet e Bashkuara të Amerikës kanë rinisur përpjekjet për të pasur një takim të dytë mes liderëve si tentativë diplomatike për të shpëtuar “planin A” të ndërkombëtarëve.
Ditën e djeshme, larg syve të mediave, Donald Lu, ambasadori i Shteteve të Bashkuara të Amerikës në Tiranë, ka takuar Edi Ramën dhe Lulzim Bashën.
Takimet mësohen se janë zhvilluar në selinë diplomatike amerikane, pikërisht në rezidencën e ambasadorit.
Burime nga palët theksojnë se gjithçka është pjesë e vullnetit pozitiv për të shpëtuar konsensusin, apo siç quhet “plani A, që do të thotë një konsensus i madh pozitë-opozitë, jo thjesht për të miratuar reformën në drejtësi, por për të zgjidhur organet e reja drejtuese të sistemit gjyqësor.
Në takimin e parë, Basha kërkoi ndarje politike të këshillave emëruese të gjyqësorit, e cila nuk u pranua kategorikisht nga Edi Rama. Por opozita shpreson se me shtytjen e amerikanëve, kreu i qeverisë do të pranojë të paktën një variant të kamufluar me ekspertë që propozohen nga palët, por që nuk janë pjesë e partive respektive.
Ndërkaq, nëse nuk realizohet “plani A” do të tentohet “pani B”, i cili parashikon që 10 deputetë nga PD-ja të votojnë reformën dhe më pas, paktin për Kryeprokurorin ta bëjë Rama me Metën. Por ky variant është i rrezikshëm pasi mund ta nxjerrë opozitën jashtë sistemit, siç kërcënoi Lulzim Basha dje, kur tha se mund të djegin mandatet e të nisin një “stinë guerile”.
Ndërkaq, “plani C” është më i thjeshtë: mosmiratim të reformës, por miratim me 84 vota në Kuvend i Byrosë Kombëtare e Hetimit, e cila mund të nisë një sërë dosjesh të bujshme për t’ia çuar Kryeprokurorit; zgjedhje të parakohshme dhe mazhoranca e re që do të zgjedhë Presidentin e Republikës në vitin 2017 do të reformojë sistemin e Drejtësisë me Këshillin e ri të Lartë të Drejtësisë.
Dhe bashkë me Presidentin, mbaron edhe mandati 5 vjeçar i Kryeprokurorit Adriatik Lalla, i cili u zgjodh nga Presidenti Nishani, në gusht të vitit 2012. /tesheshi.com/
