Shtetet e Bashkuara të Amerikës shpenzuan më shumë se një dekadë për të përgatitur reagimin ndaj hakerimit keqdashës të fuqive të huaja, por nuk patën një strategji të qartë kur Rusia nisi fushatën e dizinformimit gjatë zgjedhjeve presidenciale. Ky është konstatimi që vjen nga këshilltarë aktualë dhe të administratës së mëparshme të Shtëpisë së Bardhë, për sigurinë kibernetike.
Ekspertizën e tyre e sjell agjencia “Reuters, sipas së cilës më shumë përpjekje janë bërë për të përgatitur mbrojtjen nga sulme më pak të mundshme, edhe pse më të dëmshme, si ato mbi sistemin elektronik të votimit, atë financiar apo manipulimin e drejtpërdrejtë të makinerive të votimit.
Gjatë viteve të fundit, agjencitë sekrete amerikane kishin gjurmuar përdorimin nga ana e Rusisë të hakerimit të koordinuar dhe dizinformimit në Ukrainë dhe gjetkë, thonë ekspertët, por pati shumë pak diskutime të frutshme të nivelit të lartë për rrezikun e propagandës që ndikonte mbi Shtetet e Bashkuara.
Gjatë zgjedhjeve presidenciale, kjo propagandë ka mundur të ndikojë – deri në një farë mase – sipas burimeve të sigurisë. Por zyrtarët amerikanë ndjeheshin të kufizuar në hetimin e përpjekjeve të propagandës ruse për shkak të garancive për fjalën e lirë në Kushtetutë.
Një ish-zyrtar i Shtëpisë së Bardhë kishte deklaruar të bëhej kujdes me përpjekjet për t’u kundërpërgjigjur dizinformimin që mbështetej nga shtete te huaja, për shkak se mund të kishte pengesa të mëdha politike, ligjore dhe morale.
Sipas ekspertëve, SHBA nuk kanë më një organizatë që mundësonte anti-propagandë si gjatë Luftës së Ftohtë.
Sipas tyre, pjesa më e madhe e fushatës ruse të keqinformimit në Shtetet e Bashkuara nisi nga media të financuara nga qeveria ruse, si televizionet RT apo Sputnik përpara se të amplifikohej në Twitter nga mjetet e tjera të informimit.
Eskpertët ngrenë alarmin se qeveria amerikane duhet ta ketë prioritet ndërtimin e aftësive për të gjurmuar atë që ndodh online dhe për t’iu kundërpërgjigjur lajmeve të pavërteta.
“Këto dy gjëra duhen bërë menjëherë”, thonë ekspertët, pasi duhet gjithnjë një deklaratë publike për lajmet e tilla ose kjo sjell teori konspiracioni.
Një ligj i miratuar këtë muaj apelon që detyra të ndërmerret nga Departamenti i Shtetit që duhet të formojë një qendër të angazhimit global, por përpjekje të tilla për t’iu kundërpërgjigjur narrativave shumë më pak të sofistikuara nga ISIS, nuk kanë dhënë rezultat.
Qeveria amerikane akuzoi zyrtarisht Rusinë për një fushatë të sulmeve kibernetike kundër organizatave politike amerikane në tetor, një muaj përpara zgjedhjeve të 8 nëntorit, që nxorrën fitues republikanin Donald Trump.
Përgatiti: Juli Prifti – /tesheshi.com/
