Një nga arsyet kryesore të ardhjes në Tiranë të Sekretarit Amerikan të Shtetit, John Kerry është integrimi në Shqipëri i një numri të madh iranianësh, opozitarë të regjimit të Teheranit që ndodhen në Irak.
Për këtë ai ka marrë rugën për në Tiranë, për të zgjidhur njëkohësisht edhe prioritete të tjera të Uashingtonit në Ballkan.
Kjo është hera e dytë për dy vjet që Shqipëria përfshihet në konfliktet që kanë të bëjnë me Lindjen e Mesme.
Dy vjet më parë ishte “uragani” i armëve kimike që desh rrëzoi qeverinë “Rama”, por edhe i dha kryeministrit shqiptar një shans shumë të madh.
Uashingtoni i kërkoi Tiranës që të ofronte territorin e saj për të shkatërruar armët kimike siriane dhe në këmbim i ofroi një pakt që sillte një integrim të shpejtë në BE dhe ndihmë financiare që shkonte sa 3 herë buxheti i shtetit në një vit.
Rama i tha amerikanëve një “Po” paraprake, por menjëherë u përball me kundërshtimin e të gjithëve: opozitës, një pjesë brenda PS-së, por edhe Ilir Metës, i cili tha publikisht që “Shqipëria nuk ka këllqe ta përballojë”.
Qarqe të fuqishme rajonale të nxitura nga Rusia ndikuan që të galvanizohet një reagim i fuqishëm qytetar i cili doli në shesh për të protestuar. Madje si asnjëherë më parë u zhvillua edhe një protestë përballë ambasadës amerikane në Tiranë.
Në fund Edi Rama tha “Jo” dhe pati një hatërmbetje nga amerikanët dhe personalisht nga Sekretari John Kerry, i cili komunikoi personalisht në telefon me kryeministrin shqiptar.
Një vit më pas, marrëdhëniet u zbutën dhe Ditmir Bushati udhëtoi në Uashington ku firmosi një pakt me John Kerryn në Departamentin e Shtetit për marrëdhëniet bilaterale.
Ndërkaq, sot zyrtari më i lartë i DASH-it bisedon me autoritetet shqiptare sërish për një çështje të Lindjes së Mesme: pranimin e 2500 iranianëve të “dëbuar” nga vendi që ndodhen në “Liberty Camp” në Bagdad por që bombardohen periodikisht nga Teherani.
Tirana zyrtare ka dhënë një “Po” të madhe për këtë gjë dhe Edi Rama jo vetëm nuk ka hezituar por e ka dhënë pranimin e tij me kohë. Me të marrë përgjigjen pozitive, krahu i djathtë i Barack Obamës në qeverinë e SHBA ka marrë rrugën për në Tiranë, ku natyrisht do të lëshojë edhe mesazhet politike për pastrimin e politikës shqiptare por edhe për situatën aktuale në Kosovë. /tesheshi.com/
