Zv.presidenti amerikan, Mike Pence, thotë se SHBA-ja nuk do të lejojë kolapsin e Venezuelës, duke shtuar se një ngjarje e tillë do të kërcënonte vendet e tjera të rajonit.
“Kolapsi i Venezuelës do të rrezikonte të gjithë ata që bëjnë pjesë në hemisferën perëndimore”, deklaroi Pence, gjatë një fjalimi para rreth 600 personave në një kishë katolike në Doral, në zemër të komunitetit venezuelian të Majemit.
“Ne nuk mund të lejojmë që kjo të ndodhë dhe nuk do ta lejojmë të ndodhë. Duke punuar me aleatët tanë në rajonin latino-amerikan, SHBA-ja do të përballet dhe do të mposhtë të githë ata që guxojnë të kërcënojnë mirëqenien tonë”, theksoi ai.
Pence u shpreh se rrëzimi i Venezuelës do të shkaktonte më shumë trafiqe të paligjshme të drogës, me pasoja të përgjakshme, një rrezik që presidenti amerikan, Donald Trump e ka përmendur tashmë.
Venezuela është zhytur në një krizë të thellë ekonomike, politike dhe institucionale. Presidenti, Nicolas Maduro, me popullaritet shumë të ulët sipas sondazheve, është përbalur që prej katër muajsh me manifestime të opozitës që kërkon dorëheqjen e tij. /tesheshi.com/
