Një adoleshent amerikan nga Las Vegas ka vdekur nga një infeksion akut i shkaktuar nga një “amebë që ha trurin”, konfirmuan zyrtarët shëndetësorë të shtetit të Nevadas në një deklaratë për shtyp.
Adoleshenti, identiteti i të cilit nuk dihet, me siguri është infektuar kur ka qëndruar me prindërit e tij në qendrën e famshme rekreative Lake Mead në shtetin e Nevadas në fundjavën e fundit të shtatorit. Djali ndoshta u infektua duke notuar në ujë të infektuar, pasi ameba depërtoi përmes mukozës së hundës në trurin e tij.
Djali shfaqi simptomat e para, si dhimbje koke, ethe, të përziera dhe të vjella, një javë pasi ndërveproi me ameben fatale. Infeksioni u përhap shpejt në tru dhe djali vdiq në një kohë të shkurtër si pasojë e meningoencefalitit primar amebik (PAM), shkruan Guardian.
Vdekja e tij i tmerroi amerikanët edhe më shumë, sepse kjo është vdekja e dytë në dy muajt e fundit; le të kujtojmë dy muaj më parë, një “amebë që hante trurin” i mori jetën një djali nga Nebraska, i cili po lahej me prindërit e tij në lumin Elkhorn. Megjithatë, ekspertët paralajmërojnë se nuk ka pse të ketë panik, vetëm duhet patur kujdes.
“Është një sëmundje shumë, shumë e rrallë. Nuk ka nevojë të ngrihet alarmi për të. Njerëzit duhet të jenë vigjilentë kur ndodhen në vendet ku realisht jeton kjo amebë e rrallë. Organizmi gjendet në ujërat e freskëta me temperatura që variojnë nga 11 deri në 46 gradë Celsius”, ka thënë për Guardian, dr. Brian Labus, një epidemiolog nga Universiteti i Nevadës.
Rasti i parë i infektimit me “ameba që ha trurin” u regjistrua në Australi në fillim të viteve 1960. Që atëherë janë regjistruar disa qindra të infektuar në mbarë botën, nga të cilët vetëm dhjetë persona kanë mbijetuar. CDC – Qendrat për Kontrollin dhe Parandalimin e Sëmundjeve, regjistroi 154 raste të infektimit në SHBA që nga viti 1962, nga të cilat 152 përfunduan me vdekje. Ekspertët paralajmërojnë se një person mund të infektohet me ameba duke thithur ujë të kontaminuar gjatë notit ose duke shpëlarë kanalet e hundës me ujë të rubinetit të pazier ose të pafiltruar. Njerëzit nuk mund të infektohen duke gëlltitur amebën dhe as infeksioni nuk përhapet përmes kontaktit njeri me njeri.
Viktimat më të shpeshta janë fëmijët dhe të rinjtë që lahen në ujë të freskët gjatë muajve të nxehtë të verës. Meqenëse vetëm disa pacientë kanë mbijetuar deri më tani, nuk është e qartë se cili trajtim është më i miri. Provat eksperimentale sugjerojnë se azitromicina mund të jetë e dobishme.
“Infeksioni është 97 për qind fatal. Por 99 për qind të rasteve është i parandalueshëm. Ju mund të mbroni veten duke mos futur ujë në hundë ose duke përdorur tapa hundësh,” shpjegoi Dennis Kyle, profesor i sëmundjeve infektive dhe qelizore në biologji nga Universiteti i Gjeorgjisë.
“Kjo ka qenë një verë shumë e ngrohtë. Gjëja kryesore është se moti më i ngrohtë krijon më shumë amebë në mjedis,” shtoi Kyle. /tesheshi.com/
