Zyrtarja e lartë e Departamentit amerikan të Shtetit, Victoria Nuland do të vizitojë Ballkanin në një mision shumë të rëndësishëm për pozicionin e shqiptarëve, sidomos pas problemit të krijuar me Gjykatën Speciale në Kosovë.
Departmenti Amerikan i Shtetit ka njoftuar se ndihmëssekretarja e Shtetit për Çështjet Evropiane dhe Euroaziatike, Viktoria Nuland do të bëjë një vizitë disaditëshe në disa vende evropiane, përfshirë edhe Kosovën.
Zyrtarja e lartë amerikane vjen në Prishtinë në një kohë kur ka zëra që flasin për një zbehje në marrëdhëniet shumë të afërta prej dy dekadash midis popullit të Kosovës dhe Shteteve të Bashkuara të Amerikës.
Diplomatë amerikanë në Uashington dhe në Prishtinë kanë folur hapur për këtë zbehje pas dështimit të miratimit të amendamenteve për ‘dhomat’ e posaçme të Gjykatës Speciale. Ndër qëllime e kësaj vizite gjithsesi do të jetë trysnia për riprocedim të amendamenteve në Parlament.
Nuland do të fillojë turin e saj ballkanik në Dubrovnik, për të marrë pjesë në Kroacia Forumin vjetor të 10-tin me radhë, ku do të flasë për Ballkanin Perëndimor dhe marrëdhëniet transatlantike.
Përveç takimit me zyrtarët qeveritarë kroatë ajo do të takojë edhe liderët evropianë që marrin pjesë në konferencë me të cilët do të bisedojë për një sërë çështjesh rajonale, energjetike dhe të sigurisë.
Pas Kroacisë, Nuland do të udhëtojë në Srebrenicë, në Bosnje ku do t’i bashkohet delegacionin presidencial amerikan pjesëmarrës në shënimin e 20-vjetorit të gjenocidit në Srebrenicë.
Nga 11 deri më 14 korrik me një ekip ndërinstitucional Nuland do të vizitojë Malin e Zi, Kosovën, Maqedoninë, Shqipërinë dhe Serbinë, me udhëheqësit e të cilave dhe me pjesëtarë të shoqërisë civile do të diskutojë çështjet dypalëshe dhe rajonale, përfshirë integrimin rajonal dhe Euro-Atlantik.
“Në Kosovë dhe në Serbi, në mënyrë të veçantë, ajo do të diskutojë dialogun Kosovë-Serbi dhe progresin në zbatimin e Marrëveshjes, së 19 prillit, 2013 të arritur në Bruksel mbi normalizimin e marrëdhënieve,” thuhet në njoftimin e Departmentit Amerikan të Shtetit. /tesheshi.com/
