Shtetet e Bashkuara besojnë se Rusia ka nisur sulmet ajrore në Siri, në afërsi të qytetit të Homsit. Një zyrtar amerikan i ka dhënë këtë informacion agjencisë Reuters duke shtuar se Moska i kishte njoftuar Shtetet e BAshkuara vetëm një orë pëprara se të niste sulmet.
Zyrtari që flet në kushte anonimiteti, tha se informacioni për sulmet ajrore të Moskës është paraprak dhe refuzoi të japë detaje në lidhje me numrin e sulmeve të ndërmarra apo avionët e përdorur.
Më herët, parlamenti rus votoi pro dërgimit të forcave ushtarake në Siri, duke hapur rrugën në këtë mënyrë për operacione ushtarake.
Edhe Rusia ka konfirmuar më pas se ka nisur sulmet ajrore në Siri kundër ISIS. Moska tha se e ka paralajmëruar Uashingtonin një orë përpara sulmeve. Këto të fundit janë operacioni më i madh ushtarak i Rusisë në rajon që nga rrëzimi i Bashkimit Sovjetik në vitin 1991.
Sulmet duket se kanë pasur objektiva në Homs, por agjencia Reuters thotë se nuk ka të dhëna se ato kanë shenjuar zonat e kontrolluara nga militantët e ISIS.
Presidenti Putin tha më herët, se e vetmja mënyrë për të luftuar ata që i cilëson “terroristë” në Siri është veprimi. Përfshirja e Rusisë në Lindjen e Mesme ka mobilizuar forcën ajrore dhe do të jetë e përkohshme.
Zona e Homsit, është e rëndësishme për kontrollin e territorit nga ana e al Assad. Nëse do të binte në kontrollin e kryengritësve, zona do të ndante rajonet e kontrolluara nga qeveria prej qyteteve bregdetare të Latakias dhe Tartous-it ku Rusia ka edhe bazë detare. /tesheshi.com/
