Vaksina e Moderna-s bëhet e dyta që merr miratimin për përdorim urgjent nga Administrata e Ushqimit dhe Barnave të SHBA.
FDA njoftoi miratimin një ditë pasi komisioni i ekspertëve miratoi përdorimin e saj.
Vendimi i FDA bazohet në rezultatet e një studimi në fazën e vonë të 30,000 vullnetarëve që zbuluan se vaksina ishte gati 95 përqind efektive në parandalimin e koronavirusit. Vaksina kishte efekte anësore relativisht të vogla, përfshirë dhimbjen rreth vendit të injektimit dhe ënjtjen.
Eshtë vaksina e dytë e aprovuar pas asaj Pfizer / BioNTech të premten e kaluar.
“Duke qenë se dy vaksina janë tani në dispozicion për të parandaluar COVID-19, FDA ka ndërmarrë një hap tjetër thelbësor në luftimin e kësaj pandemie globale që po shkakton një numër të madh të shtrimeve në spital dhe vdekjeve në Shtetet e Bashkuara në baza ditore,” tha Komisioneri i FDA, Stephen M Hahn.
Vaksina e Moderna-s pritet të përdoret në vende të vështira për t’u arritur, siç janë spitalet rurale. Të parët që do të vaksinohen do të jenë njerëzit më të ekspozuar ndaj koronavirusit, ku veçojnë stafet dhe banorët e azileve.
Ashtu si ajo e Pfizer, vaksina e Moderna-s do të bëhet dy herë me një interval prej 28 ditësh.
Një nga ndryshimet kryesore midis tyre është se vaksina e Moderna-s mund të ruhet në -20 gradë, ndërsa Pfizer duhet të ruhet dhe mbahet në -75 gradë Celsius, gjë që e bën transportin e saj shumë të komplikuar.
Moderna ka kontrata me qeverinë amerikane, sipas të cilave duhet të sigurohen 20 milion doza këtë vit dhe gjithsej 200 milion doza deri në fund të qershorit 2021. Kompania e bioteknologjisë ka rënë dakord me qeverinë amerikane për t’u përgatitur për shpërndarjen e 5.9 milion vaksinave sa më shpejt që këtë fundjavë.
Presidenti i SHBA Donald Trump në Twitter mirëpriti autorizimin e vaksinës. “Urime, vaksina e Moderna-s tani është në dispozicion,” shkroi ai.
“Kemi ditë më të ndritura përpara”, tha Presidenti i sapozgjedhur i SHBA Joe Biden, i cili planifikon të vaksinohet personalisht të hënën. /tesheshi.com/
